निक्वलं संसद विघटन ठीक खः ः ओली

येँ -नेकपा एमालेया अध्यक्ष केपी ओलीं सरकारय् दुगु इलय् थःपिंसं असाधारण ज्या यानागु धासें वहे ज्याया खँ ज्वनाः चुनावय् वनेत कार्यकर्तायात निर्देशन बियादीगु दु । पार्टीया केन्द्रीय बैठकय् न्ववासें वय्कलं थ्व निर्देशन बियादीगु खः ।

वय्कलं थःपिं आः प्रतिपक्षय् दुसां छु एजेन्डा ज्वनाः वने धकाः चिन्ता कायेमाःगु मदु धासें अध्यक्ष ओलीं थःगु शासनकालय् विकासया भिजन न्ह्यब्वयागु व राष्ट्र संघीय दिगो विकास लक्ष्य कायेगु गतिइ द्रुत रुपं ज्या यानागु खःसां कोभिडया कारणं ज्या याये मफुगु खँ नं धयादिल ।

उकथं हे अध्यक्ष ओलीं थम्हं निक्वः तक यानागु संसद विघटनया निर्णय सही खः धासें ताजा जनादेशय् वनेगु खँयात प्रतिगमन धाये मजिउगु तर्क नं तयादिल ।

वय्कलं धयादिल, ‘ताजा जनादेशय् वनेगु खँ बालाःगु खः, बांलाःगुलिं हे संसद विघटन यानागु खः । पार्टी अध्यक्ष व प्रधानमन्त्रीयात बस्वायेगु नितिं गुगु षडयन्त्र न्ह्याकल उकिं ताजा जनादेशय् वनेगु खँ म्हिगः नं पाय्छि खः, थौं नं पाय्छि खः, कन्हय् नं पाय्छि जुइ ।’

‘माओवादी लिसे एकता सोच विचार मयासे यानागु खः, तर उगु एकता भंग यायेत गुगु षडयन्त्र जुल, उकियात हाचां गाये मफयेवं विघटन जुल’ वय्कलं धयादिल ।

ओलीया धापू लिपा उपमहासचिव घनश्याम भुसालं स्वंगू बुँदाया बिस्कं मत तयादिल । वय्कलं अध्यक्ष ओली प्रधानमन्त्री जुयाच्वंगु इलय् याःगु संसद विघटन असंवैधानिक धकाः निर्णय यायेमाःगु प्रस्ताव तयादीगु धयादीगु दु । वय्कलं धयादिल, ‘संसद विघटन संविधान अःखः मंकाः निर्णय यात धाःसा पार्टीया मेगु विवाद नं अःपुक न्ह्याःवनी ।’

सम्बन्धित बुखँ

LEAVE YOUR COMMENTS