ओमबहालय् छेँया ल्वापुइ किजाम्हं दाजुयात मुगलं दायाः स्याना बिल

येँ (नेपालभाषा टाइम्स)- येँ मनपा २३ वडास्थित ओमबहा त्वाःया माथेमा चोकय् किजाम्हेस्यां मुगलं छ्यानाः दाजुम्हेसित स्यानाबिउगु दु ।

म्हीग चान्हय् छेँय् विवाद जुइवं २५ दँ दुम्ह सुरज शाक्यं मुगलं छ्यानाः दाजुम्ह सूर्य शाक्ययात स्याःगु खः । दाजुम्हेसित मुगलं छ्यानाः बिसिउँ वनाः सुलाच्वंम्ह सुरजयात येँया सीघलं म्हिगः सुथय् १० बजे ज्वंगु खः ।

अय्लाः त्वनाः वःम्ह दाजुं मांम्हेसित म्हुतु वात धकाः तंया झाेंकय् किजाम्हं मुगलं छ्याना बिउगु खः । अन दाजुकिजा दथुइ तःक्वः हे ल्वापु जुइगु यानाच्वंगु खँ प्रहरीं धाःगु दु ।
घटना जूगु परिवारया दाजुकिजापिं निम्हं आर्थिक समस्या दुपिं खः । दाजु स्याःम्ह किजाम्हेसित प्रहरीं ज्वंगु दुसा सीम्ह धाःसा पोष्ट मार्टमया लागिं प्रहरीं ज्वना वंगु दु ।