शहीद दिवस बहिष्कार याइम्ह मेयरया शहीद प्रेम !

येँ (नेपालभाषा टाइम्स)- येँ महानगरपालिकाया जारी जुयाच्वंगु नगरसभाया बैठकय् थम्हं हःगु प्रस्ताव फेल जुइगु खने दयेवं मेयर बालेन साह नगरसभाया बैठकय् हे मच्वँसे बेपत्ता जूगु दु । म्हिगः सुथय् ८ बजे नगरसभाया बैठक सःता तःगु खःसां ११ बजे तक नं मेयरया अत्तापत्ता मदयेवं बैठक ‘स्थगित’ याःगु खः ।

मेयर साहं न्हूसतकय् नो भेहिकल यायेगु धकाः तःगु बुँदा संशोधन मयायेकं वडा अध्यक्षतय्सं नीति तथा कार्यक्रम पारित याकी मखु धइगु खँ सीवं मेयर साहं बैठकय् तकं वयेगु आँट मयाःगु खः । वय्कः बैठकय् गबले थ्यनी धकाः सीकेत वडा अध्यक्षतय्सं फोन याःसां मेयर साह फोन तकं अफ यानाः बेपत्ता जूगु खः । वय्कःया फोन समेत स्वीच अफ जूगुलिं वडा अध्यक्षतय्सं ‘काठमाडौंया मेयर तन धकाः सुचं बी माल’ धकाः नं ध्याचू नकूगु खः । न्हिछि बेपत्ता जूम्ह मेयर साहं न्हिनय्पाखे सामाजिक सञ्जालय् तयाहःगु पोष्ट खनाः धाःसा वडा अध्यक्षत अजूचाःगु दु ।

मेयर साहं थम्हं एमाले व कांग्रेसया नेतात वीपी कोइराला, मदन भण्डारीया नामय् कार्यक्रम यायेगु मखु बरु प्यम्ह शहीदपिं शुक्रराज जोशी, गंगालाल श्रेष्ठ, धर्मभक्त माथेमा व दशरथ चन्दया नामय् कार्यक्रम यायेगु धकाः प्रस्ताव तयागुलिं वडा अध्यक्षतय्सं बैठक बहिष्कार याःगु धकाः द्वपं बियादीगु खः । मेयरया थ्व पोष्टयात वडा अध्यक्षतय्सं धाःसा हास्यास्पद धाःगु दु । येँ महानगरपालिकां दँय्दसं माघ महिनाय् न्यायेकीगु शहीद दिवसया फुक्क हे ज्याझ्वः मेयर साहं बहिष्कार याना वयाच्वंगु दु । शहीद दिवसया ज्याझ्वः तकं बहिष्कार याइम्ह मेयरं आः वयाः वहे शहीदपिनि नां न्ह्यःने तये हःगु हास्यास्पद जूगु खँ धाःगु दु ।

मेयरं शहीदपिनि नां न्ह्यःने तःबलय् वडा अध्यक्षतय्सं उकियात सहर्ष स्वीकार यानाः शहीदपिं लगायत देशय् प्रजातन्त्र हयेगु लागिं जीवन पाना वंपिं नेतातय्गु नामय् नं कार्यक्रम यायेगु धाःबलय् मेयरं प्रजातन्त्रवादी नेतातय्त अपमान यासें उमिगु नामय् कार्यक्रम याये मखु धकाः अडान काःगु खँ वडा अध्यक्षतय्सं
धाःगु दु ।

उपमेयरया भ्रमण रद्द
येँ महानगरपालिकाया उपप्रमुख सुनिता डंगोलया थनिंनिसें जुइगु पोर्चुगल भ्रमण रद्द जूगु दु । येँ महानगरपालिकाया नगरसभाय् नीति व ज्याझ्वःया विषययात कयाः विवाद जुइवं वय्कलं थःगु भ्रमण रद्द यानादीगु खः । विवादया दथुइ थः देय् त्वःताः वनेबलय् थःगु कारणं यानाः हे बैठक च्वनेमफुगु भ्रम न्यना वनेफइगु खनेवं वय्कलं भ्रमण रद्द यानादीगु खः । म्हिगः नीति व ज्याझ्वः पारित जुइगु अनुमान यासें वय्कः पोर्चुगल भ्रमणया ज्याझ्वः दयेकादीगु खः ।