ने. सं. ११४३ चौलाथ्व सप्तमी -

लोकसेवा विरुद्ध थौं देय्न्यंकं प्रदर्शन

येँ – स्थानीय तहया निंतिं लोकसेवा आयोगं पिथंगु विज्ञापन समावेशी मजू धासें नेपाल आदिवासी जनजाति महासंघया नेतृत्वय् म्हिगः आयोगया अनामनगरय् च्वंगु केन्द्रीय ज्याकू न्ह्यःने प्रदर्शन यात । लिसें म्हिगः देय्न्यंकं प्रदर्शन जूगु खँ आदिवासी जनजाति नेता गोविन्द छन्त्यालं नेपालभाषा टाइम्स यात कनादिल ।

वय्कःया कथं म्हिगः गन गन लोकसेवा आयोगया ज्याकू दुगु खः अन अन लोकसेवा विरुद्ध प्रदर्शन याःगु खःसा लोकसेवा आयोग मदुगु थासय् सिडिओ ज्याकू व स्थानीय निकायया ज्याकू न्ह्यःने प्रदर्शन याःगु खः । आयोगं वंगु असारय् याःगु विज्ञापनया परीक्षा थनिंनिसें शुरु जुइत्यंगु दुसा उकियात खारेज यायेमाःगु माग यासें थीथी जातीय संघसंस्था लिसें उत्पीडित समुदायं प्रदर्शन याना वयाच्वंगु दु ।

म्हिगः प्रदर्शनया झ्वलय् छुं ई तनाव ब्वलंगु खःसा यातायात नं ठप्प जूगु खः । लिपा प्रहरीं प्रदर्शनकारीकारीतय्त अनं चीकेगु कुतः याःगु खः । लोकसेवा आयोगं पिथंगु विज्ञापन लिसें आदिवासी जनजाति महासंघ लगायत थीथी संगठनं निरन्तर रुपं विरोधया ज्या याना वयाच्वंगु दु ।

उकथं हे थौं नं देय्न्यंकं विरोध प्रदर्शन यायेगु ज्याझ्वः दयेकातःगु दु । थ्व आन्दोलन कन्हय् तक न्ह्यानाः वयां लिपा आन्दोलनया समीक्षा यायेगु अनं लिपा मेगु चरणया आन्दोलन घोषणा यायेगु तयारी जुयाच्वंगु दु ।

थौं लोकसेवा आयोगं परीक्षा कायेगु ज्या न्ह्याकेत्यंगु दुसा उकिया विरोधय् परीक्षा जुइगु जिल्ला बन्द यायेगु लिसें फयांफछि परीक्षा हे डाँवाडोल यायेगु तयारी जुयाच्वंगु खँ सीदुगु दु । थ्वहे झ्वलय् थौं संघीय मामिला तथा सामान्य प्रशासन मन्त्री लालबाबु पण्डितया पुतला च्याकेगु ज्याझ्वः तयातःगु दु । न्हिनसिया १ बजे देय्न्यंकं पुतला च्याकेगु ज्याझ्वः दु ।