गणतन्त्र दिवसया निंतिं येँ मनपाया तयारी

येँ- येँ महानगरपालिकां गणतन्त्र दिवस न्यायेकेगु तयारी तयारी न्ह्याकूगु दु । थ्व हे वइगु जेठ १५ गते झिंछक्वःगु गणतन्त्र दिवसया तयारीकथं येँ मनपां सुचुकुचु यायेगु व महानगरया लागायात छायेपीगु ज्या न्ह्याकूगु खः ।
गणतन्त्र दिवसया निंतिं गठन यानातःगु मूल समारोह समितिं येँ मनपाया प्रमुख विद्यासुन्दर शाक्यया संयोजकत्वय् मंच सजावट व व्यवस्थापन उपसमिति गठन यानातःगु खःसा थ्वहे उपसमितिं दिवसया निंतिं माःगु तयारी न्ह्याकूगु खः ।

उपसमितिया सदस्य सचिव विष्णु जोशीं बियादीगु जानकारीकथं दिवसया तयारीकथं येँ मनपां थौंकन्हय् महानगरया लागा सुचुकुचु यायेगु व मेमेगु सजावटया ज्या यानाच्वंगु दु । गणतन्त्र दिवसकुन्हु येँ मनपापाखें त्वनेगु लःया व्यवस्था यायेगु नापं सर्वसाधारणयात च्वनेगु निंतिं द्वःछिगू मेचया व्यवस्था याइगु जूगु दु । थुकथं हे थीथी समुदायपाखें सांस्कृतिक ज्याझ्वः न्ह्यब्वयेगु निंतिं नं येँ मनपां तयारी याःगु दु ।

थ्व हे झ्वलय् दिवसय् सहभागि जुइपिं पाहांपिंत छुं नं समस्या वल धाःसा तत्काल उद्धार यायेगु निंतिं ज्याझ्वः ज्वःछिया निंतिं येँ मनपां एम्बुलेन्स व दमकल नं परिचालन याइगु जूगु दु । उकिया निंतिं येँ मनपाया प्रमुख शाक्यया संयोजकत्वय् च्वंगु मंच व्यवस्थापन समितिया बैठकं दिवसया लसताय् जुइगु ज्याझ्वः स्वयेत वइपिं सर्वसाधारणयात च्वनेगु मेच, त्वनेगु लः व ज्याझ्वः जुइगु मुख्यस्थल सैनिक मंच तिंख्यः छायेपीगु लगायतया निर्णय याःगु खः ।
थुकथं हे बैठकं हेलिकप्टरं ब्वज्या याइगु ब्यानर व वा गायेकेत आवश्यक स्वां नेपाली सेनायात उपलब्ध याकेगु नापं साउण्ड सिस्टमया व्यवस्था यायेगु नं निर्णय याःगु दु ।