अमेरिकाय् शनिवाः सापारु

येँ (नेपालभाषा टाइम्स)- थुगुसी जूगु सायाः हनेगु अन्यौलया दथुइ म्हिगः ख्वप लगायत देय्या थीथी थासय् सायाः पिहां वल । स्वनिगलं पिने हेटौंडा, पाल्पा, नेपालगञ्ज, खाँडवारी, वुटवल आदि यक्व थासय् म्हिगः हे सायाः पिहां वःगु खः । येँय् नं म्हिगः छुं मनूतय्सं सायाः पिकाःगु दु ।
अथे खःसां येँया मू सायाः धाःसा थौं पिहां वइगु जुयाच्वंगु दु । थौंया सायाःयात सहज यायेत येँ मनपां थौं येँ मनपा दुने लागाय् सार्वजनिक बिदा बिउगु दु ।

थौं हे यलय् मतयाः पिहां वइगु जूगु दु । यल दुने जूसां बुंगय् धाःसा म्हिगः हे मतयाः पिहां वःगु खः । म्हिगःयात पुन्हि माने यानाः हरिसिद्धि, कोन्ति, थिमि आदि थासय् पिकायेमाःगु प्याखंत धाःसा म्हिगः हे पिहां वःगु खः ।

थ्वहे झ्वलय् अमेरिकाय् च्वंपिं नेवाःतय्गु संस्था नेपाः पासा पुचः अमेरिकाय्या ग्वसालय् शनिवाः सायाः पिकाइगु जूगु दु । मेरिल्याण्डया सिल्भर स्प्रिङ गार्डेनय् जुइगु उगु ज्याझ्वलय् च्यागू परिवारं सायाः पिकाइगु ग्वसाः दु । थुकी धिमे, घिन्तांघिसि आदि नं दइ । विदा जूगुलिं अप्वः मस्तय्सं ब्वति काइगु खँ पासा पुचःया नायः मनोहर श्रेष्ठं कनादीगु दु ।