निम्ह मुख्यमन्त्रीया संघीयता चिउताः

येँ – प्रदेश नम्बर २ या मुख्यमन्त्री लालबाबु राउतं संघीय सरकार केन्द्रया इकाई मखुसें थः हे सार्वभौम सत्ता जूगु खँ धयादीगु दु । गण्डकी प्रदेशया मुख्यमन्त्री कृष्णचन्द्र नेपालीया ब्वनाय् पोखरा भ्रमणय् झायादीम्ह राउतं म्हिगः उगु खँ धयादीगु खः ।

निगू प्रदेशय् आन्तरिक पर्यटक प्रवद्र्धनया नितिं नाट्टा गण्डकी प्रदेशं म्हिगः याःगु अन्तक्र्रिया ज्याझ्वलय् न्ववासें वय्कलं प्रहरी संगठन अझ नं प्रदेश मातहत मवःगु खँय् नं असन्तुष्टि प्वंकादिल ।
व्यवस्था हिउसां नं उकी दुने दुपिं मनूतय् व्यवहार व चरित्र महिउगुलिं संघीयताया सफल कार्यान्वयन मजू धासें वय्कलं धयादिल, ‘कुशासनयात सुधार यायेगु अवसर निगू तिहाईया सरकारयात दुगु खः, उकिं नं सुधार याये मफुत, सरचनाय् संघीयता तयार जूसां नं मानसिकताय् अझं तयार मजूनि ।’

उकथं हे गण्डकी प्रदेशया मुख्यमन्त्री नेपालीं स्रोत व शक्ति इनेगु ज्या मजुयाः जनतां संघीयता प्रति गुनासो प्वंकाच्वंगु खः धासें धयादिल, ‘संघीयता गन दु धकाः जनतां चिउताः प्वंकाच्वंगु दु, संघीयतायात अझ नं झीसं बांलाक बाँडफाँड याये फयाच्वंगु मदु, वय्कलं प्रहरीया उदाहरण बियादिल, वन व स्वास्थ्यया उदाहरण जिं बियाच्वना ।’

मुख्यमन्त्री नेपालीं संघीयता बल्लात धाःसा राष्ट्रियता खतराय् लाइगु मखुसें संघीयता बमलात धाःसा राष्ट्रियता खतराय् लाइगु दावी नं यानादिल ।