ख्वालय् हाखः पानाः विरोध !

येँ- थीथी कथंया विकास व सतक निर्माणया कार्यक्रम हयाः ख्वनाया सांस्कृतिक पहिचान हुया छ्वयेगु कुतः याःगुलिं उकिया विरुद्ध अनया जनतां थःगु हे ख्वालय् हाखः पानाः न्हूगु कथंया आन्दोलन शुरु याःगु दु । नेपाल सांस्कृतिक पुनर्जागरण अभियानया नेतृत्वय् म्हिगः अनया स्थानीय जनतां थःगु ख्वालय् थःपिंसं हे हाखः पानाः थ्व विरोध ज्याझ्वः शुरु याःगु खः ।

विकास निर्माणया नामय् स्थानीय जनतायात विस्थापित यानाः उमिगु पहिचान हुया छ्वयेगु कुतः राज्यपाखें याःगु धासें अन थ्व अभियान शुरु याःगु खः । अभियान शुरु याये न्ह्यः अन हे छगू सभा नं जूगु खः । सभाय् अभियानया न्ह्यलुवा असोज महर्जनं सम्बोधन यासें थःपिनि समस्या प्रति राज्यया ध्यान साला कायेगु लागिं थ्व अभियान न्ह्याकागु खँ कनादिल ।

विकासया नामय् स्थानीय जनता–यात तसकं म्हो जक मुआब्जा बियाः उगु भूमि हड्पे यानाच्वंगु द्वपं नं वय्कलं बियादिल ।
लिसें अन विद्रोहया म्ये हालाः सांस्कृतिक प्रस्तुति नं बिउगु खः । थःपिनि आन्दोलनयात कयाः अभियानपाखें छगू अपिल नं जारी याःगु दु । अपिलय् थःगु हे देशया जनतायात खिउँथाय् तयाः बुलुगु लखय् न्या लायेत पल्के थूपिं राज्यसत्ताया मनूतय्सं ख्वनाया स्थानीय जनतायात थःगु हे भूमिपाखें विस्थापित यायेत स्वयाच्वंगु खँ धयातःगु दु । सलंसः दँ न्ह्यवंनिसें थःगु हे कथंया गुथि परम्परा न्ह्याकाः संस्कार संस्कृति न्ह्याका वःपिं स्थानीय जनता अनं विस्थापित जुयाः वने माल धाःसा उमिगु पहिचान समेत नष्ट जुइगु खँ उकी न्ह्यथनातःगु दु ।