बञ्चरे डाँडाय् तत्काल फोहर वायेगु बन्द यायेमाः

येँ (नेपालभाषा टाइम्स)÷ स्वनिगःया थीथी स्थानीय तहय् फोहर संकलन यानाः उकिया अन्तिम व्यवस्थापन याना वयाच्वंगु बञ्चरे डाँडा ल्याण्डफिल्ड साइटय् तत्काल फोहर यंकेगु ज्या दिकेमाःगु सरोकारवालातय्सं धाःगु दु । स्वनिगःया थीथी थासं सकतां कथंया फोहर उठे यानाः बञ्चरे डाँडा ल्याण्डफिल्ट साइट यंकेगु ज्या तत्काल दिकेमाःगु सरोकारावालतय्सं उगु लागाया अवलोकन लिपा उकथंया प्रतिक्रिया बिउगु खः ।

येँ महानगरपालिकाया प्रवक्ता नविन मानन्धर, वातावरण समितिया संयोजक बालकृष्ण महर्जन, दुजःपिं भुवन लामा, वीरेन्द्र प्रजापति, वातावरण व्यवस्थापन विभागया प्रमुख रविनमान श्रेष्ठ लगायतया पुचलं बञ्चरे डाँडाया लिपांगु अवस्थाया अवलोकन लिपा उकथंया निष्कर्ष पिकाःगु खः ।

बर्खा शुरु जूगुलिं मदिक्क वा वयाच्वंगु कारणं ल्याण्डफिल्ड साइट, ल्याण्डफिल्ड साइट वनेगु लँ, अनया मेमेगु पूर्वाधार, उगु लागाया सामाजिक पक्षया व्यवस्थापनया सम्भावित अध्ययन, अवलोकनया निंतिं वंगु पुचलं उकथंया निष्कर्ष पिकाःगु खः । उगु इलय् अवलोकन पुचलं ल्याण्डफिल्ट साइट व्यवस्थापनय् ज्या याइपिं कर्मचारी, फोहर ढुवानीया अवस्था, फोहर ढुवानी याइगु सवारीया चालकलिसें उगु लागाया स्थानीयतलिसें अनया अवस्थायात कयाः आवश्यक जानकारी कयादीगु खः । वया. लिपा वय्कःपिंसं साइटतक वनेगु सतक व साइट व्यवस्थापनया ज्याया नं निरीक्षण यानादीगु खः ।

ल्याण्डफिल्ड साइटय् वयेफुगु सम्भावित समस्याया अनुमान, समस्या वयेके मबीगु, फोहर व्यवस्थापनय् समस्या वयेके मबीगु ल्याखं पुचलं अनुगमन याःगु खः । अवलोकन लिपा महानगर प्रवक्ता मानन्धरं ल्याण्डफिल साइटय् अन्तिम व्यवस्थापनया निंतिं यंकीगु फोहरया मात्रा आपालं जुइवं उकिया उपयोगिता अवधि म्हो जुजुंवनाच्वंगु धासें थुकथं मदिक्क फोहर यंका च्वनेगु खःसा ल्याण्डफिल्ट साइटया अवधि झिंन्यादँया दुने हे सिधइ धयादिल ।

येँ महानगरपालिकां स्रोतय् वर्गीकरण यानाः फोहर क्वपालेगु गुगु अभियान न्ह्याका च्वंगु खः उकियात मेमेगु स्थानीय तहं नं अनुशरण यायेमाः धयादिल । वातावरण समितिया संयोजक बालकृष्ण महर्जन. फोहर व्यवस्थापनया निंतिं उत्पादकनिसें व्यवस्थापन याइगु निकाय तक स्वाना वनेमाः धासें रहेकं प्रत्येक चक्र पूवंकेत ग्वाहालि यायेमाः धयादिल ।