ने. सं. ११४३ ञलाथ्व चतुर्दशी -

महानगरया आर्थिक ग्वाहालिइ निःशुल्क हेमोडायलाइसिस सेवा

येँ- येँ महानगरपालिकाया ग्वाहालिइ छाउनिस्थित वीरेन्द्र सैनिक अस्पतालय् निःशुल्क हेमोडायलिसस सेवा शुरु जूगु दु । येँ महानगरया आर्थिक ग्वाहालि व नेपाली सेनाया व्यवस्थापनय् वीरेन्द्र सैनिक अस्पताल छाउनिइ जँलास्येँया ल्वगितय् निंतिं निःशुल्क हेमोडायलिसस सेवा शुरु याःगु खः ।

येँ महानगरपालिकाया प्रमुख विद्यासुन्दर शाक्य व नेपाली सेनाया प्रधानसेनापति पूर्णचन्द्र थापां मंकाःकथं उगु सेवाया शुरु यानादीगु खः । सेवा शुभारम्भ लिपा येँ महानगरपालिकां थम्हं हे अस्पताल संचालन यायेगु नीति तथा कार्यक्रमय् न्ह्यथनागु जानकारी बियादिसें तत्कालया निंतिं अस्पताल संचालन यायेगु सम्भव मजूगुलिं विशेषज्ञ सेवा दुपिंनाप सहकार्य यानाः महानगरवासीयात स्वास्थ्य सेवा बीगु कुतः यानागु जानकारी बियादिल ।

जँलास्येँया ल्वचं कयेधुंकाः उपचार याये स्वयां न्ह्यः हे उकियात पनेत वा ल्वचं कःगु हे जूसां उकियापाखें थप जटिल अवस्था वयेके मबीत थुगुसीनिसें हे ‘स्वस्थ मिर्गौला–स्वस्थ काठमाडौं’ ज्याझ्वः शुरु यायेधुंगु खँ कनादिसें वय्कलं ‘मृगौला बचाउ अभियान’ नांया संस्थाया सहकार्यय् महानगरया स्वीनिगुलिं वडाय् ज्याझ्वः नं संचालन यायेधुंगु दु नं खँ कनादिल ।

०७६ पुस २ गते येँ महानगर व नेपाली सेना दथुइ उगु सेवाया निंतिं जूगु सम्झौता जूगु खः । न्यादँया निंतिं सहकार्य यायेकथं जूगु सम्झौताकथं उगु सेवा संचालनया निंतिं येँ महानगरपालिकां अस्पतालयात स्वंगू करोड तका दां उपलब्ध याकूगु खः । येँ महानगरं सेवा संचालनया निंतिं आवश्यक भौतिक पूर्वाधार, हेमोडायलिसस मेशिन च्यागः, रिप्रोसेसिङ मेशिन छगः, लः शुद्ध यायेगु प्लान्ट व मेमेगु आवश्यक स्वास्थ्य सामग्री व उपकरणया निंतिं उगु आर्थिक ग्वाहालि उपलब्ध याकूगु खः ।

येँ महानगर व सेनाया दथुइ जूगु सम्झौताकथं वालय् निगू सिफ्टय् सेवा संचालन यानाः तत्कालया निंतिं ४८ म्ह डायलिसस यायेमाःपिं जँलास्येँया ४८ म्ह ल्वगियात वालय् निक्वः सेवा बीगु जूगु दु । आर्थिक रुपं विपन्न, सेरोनेगेटिभ दीर्घ चरणया ल्पगि, जँलास्येँया ल्वगि, क्रोनिक जँलास्येँया समस्या जुयाः न्यागूगू स्टेजतक थ्यने धुंकूपिंत बीगु थ्व सेवा कायेत वइपिं ल्वगितय्सं महानगरपालिकां बिउगु सिफारिस भ्वं ज्वना वयेमाःगु अस्पतालया प्रमुख सहायक रथी डा. अरुण शर्मां जानकारी बियादिल ।

सेवा संचालनया निंतिं उपचारय् संलग्न छम्ह एमबीबीएस चिकित्सक, स्वम्ह स्टाफ नर्स, छम्ह हेमोडायलिसस प्राविधिक, प्रशासन स्वम्ह छम्ह, छम्ह सफाइ कर्मचारी यानाः न्हय्म्हेसिया छगू युनिट नं निर्माण यानातःगु दुसा थुपिं जनशक्तिया खर्च नं यैँ महानगरं हे याइगु जूगु दु ।

सरकारया छगू तथ्यांककथं नेपालय् दँय्दसं देय्न्यंकंया ६५ गू अस्पतालया झण्डै न्यासः डायलोसिस मेशिनपाखें स्वसःत्या स्वयां अप्वः जँलास्येँया ल्वगितय्सं निःशुल्क हेमोडायलाइसिस सेवा कया वयाच्वंगु दुसा थ्व वापत राज्य छम्ह विरामीया निंतिं दँय्दसं निगू लाख ख्वीद्वः तका खर्च व्यहोरे याना वयाच्वंगु दु ।