मिसा साहित्यकार मुनाया चिनाखँ गोष्ठी
येँ – मिसा साहित्यकार मुनां जनकवि दुर्गालाल श्रेष्ठजुया मूपाहाँसुइ जूमपाखें चिनाखँ गोष्ठी याःगु दु । वंगु शनिवाः जूगु ज्याझ्वलय् मदयावंपिं नेपालभाषाया साहित्यकारपिं माणिकलाल श्रेष्ठ, लक्ष्मण राजवंशी, कृष्णप्रकाश श्रेष्ठ, इन्द्र माली, रमापति राज शर्मा व पूूर्ण वैद्यपिंत लुमंकाः श्रद्धाञ्जली देछायेगु व १ मिनेट मौन धारण याःगु खः ।
मिसा साहित्यकार मुनाया नायः साहित्यकार अञ्जना ताम्राकारं सभा नायःया थासं न्ववायेगु झ्वलय् जनकवि दुर्गालाल श्रेष्ठ बारे चिनाखँ न्यंकाः वय्कःयात देछानादीगु खः । वय्कलं मिसा साहित्यकार मुनाया तातुना नःलिपिं मिसा मस्तय्त साहित्य सृजना यायेत हःपाःबीगु व पुस्ता हस्तान्तरण याना यंकेगु खः धयादिल । मिसा साहित्यकार मुनाया हामा भाषाविद् डा. ज्योतिप्रभा तुलाधरं जनकवि श्रेष्ठया छपु छपु कविता झीगु निंतिं देगः समान खः धयादिल । अथेहे वय्कलं जनकविया नां अन्तरर्राष्ट्रिय ख्यलय् थकयाः गौरवमय यायेमाःगु, वय्कःया पुलांगु चिनाखँ सपूmत हाकनं पिथने माःगु खँ न्ह्यथनादिल ।
मूपाहाँ जनकवि दुर्गालाल श्रेष्ठं कोरोनाया प्रतिकूल स्थितिइ नं साहित्यया सिनाज्या न्याःगु थें जूगु खँ प्वंकादिल । वय्कलं डा. तुलाधरं च्वयादीगु समालोचनात्मक च्वसु ‘डा. सत्यमोहन जोशीया उत्कृष्ट महाकाव्य अरनिकोया श्वेतचैत्य’ ब्वनाः सत्यमोहनयात स्वयेगु मिखा चूलात धयादिल । अथे हे झीगु समसामयिक भाषाया थौंया अवस्थायात कयाः उपेक्षित जातितय्सं मंकाः जुयाः हालेमाःगु म्ये चिनाखँया रुपय् न्यंकादिल । अथे हे ‘सिमाया थःगु खँ’ नांगु चिनाखँ नं न्यंकादिल ।
चिनाखँ वाचनया झ्वलय् रितादेवी प्रधान, रिता महर्जन, भवानी तुलाधर, राजेश्वरी राजोपाध्याय, बिमला मानन्धर व अञ्जना ताम्राकारपिसं चिनाखँ न्यंकादिल । चिनाखँ वाचन ज्याझ्वःया दथुइ मिसा साहित्यकार मुनाया न्हय्म्ह उपन्यासकार दुजःपिनिगु म्हसीका बीगु ज्या जुल ।
वाचन जूगु चिनाखँया समीक्षा यायेगु झ्वलय् भाषाथुवाः प्रा. डा. सुन्दरकृष्ण जोशीं थःगु अनुभव कनादिसे दुर्गालालजुपाखें प्रभावित जुयाः साहित्यया लँपु लिनागु खँ न्ह्यथना दिलसा वाचन जूगु खुपु चिनाखँयात दुग्यंक दुवाला दिल । वय्कलं थःगु चिनाखँ छपु व दुर्गालाल श्रेष्ठजुयागु चिनाखँ छपु न्यंकादिल ।
समीक्षाया झ्वलय् आधुनिक कवि डा. आनन्द जोशीं कवि टि.एस. इलिएटं बिश्वयुद्धया प्रभाव बारे च्वःगु कबिता वेस्ट्लायण्डया छुं छुं खँ कनादिल । नापं थःगु काव्यिक यात्राया बारे नं बःचाहाकलं कनादिल । वय्कलं कोरोना विषययात कयाः चिनाखँ न्यंकादिल ।
जूम प्रविधि ग्वाहालि यानादीम्ह इन्जिनियर स्वयम्भुधर तुलाधरं नुगःखँ तयेगु झ्वलय् ६० दँ न्ह्यः शान्ति निकुञ्ज स्कुलय् साहित्य सम्मेलन जूगु इलय् दुर्गालाल श्रेष्ठं म्ये च्वयादीगु खँ स्मरण यानादिल ।
मय्जु बिमलप्रभा बज्राचार्यं सुभाय् न्वचु बियादीगु ज्याझ्वःया चिनाखँ वाचन व समीक्षा ब्व मय्जु दिब्या ताम्राकारं न्ह्याकादीगु खः ।
LEAVE YOUR COMMENTS