गद्यगुरु पं. निष्ठानन्दया बुन्हि हन

येँ (नेपालभाषा टाइम्स) – नेपालभाषाया प्यंगःथांमध्ये छगः गद्यगुरु पं. निष्ठानन्द वज्राचार्यया १६४ क्वःगु बुन्हि हनेगु ज्या जुल । थुगुसी कोरोना भाइरसया जोखिमयात ध्यानय् तयाः औपचारिक रुपं छुं नं ज्या मयासे ओमबहाः त्वाःया नबहिलिइ च्वंगु वय्कःया झ्वताय् स्वां देछासे बुन्हि हनेगु ज्या जूगु खः ।

वंगु थिंलाग्व चौथिकुन्हु वय्कःया झ्वाताय् स्वां देछायेगु ज्याझ्वलय् वय्कःया छेँजःपिं, त्वाःबहाःयापिं व छुं भचा भाषा ख्यःया व्यक्तित्वपिनिगु जक उपस्थिति दुगु खः । पं. निष्ठानन्द वज्राचार्यया बुन्हिया लसताय् ओलम्पस क्लब व निष्ठानन्द स्मृति गुथिपाखें दँय्दसं थिंलाथ्व चौथिकुन्हु नसंचा उलाः औपचारिक ज्याझ्वः यायेगु याना वयाच्वंगु खः ।

थ्व हे झ्वलय् पं. निष्ठानन्दया बुन्हिया लसताय् वज्राचार्यं क्लबया ग्वसालय् वय्कःया झ्वाता तयातःगु नबहिलिइ बहनि छगू दिपावली ज्याझ्वः नं याःगु खः । उगु ज्याझ्वलय् राजगुरुजु मञ्जुश्रीरत्न वज्राचार्य, पं. निष्ठानन्दया छुइ नेवाः न्ह्यलुवा पवित्र वज्राचार्य, बौद्ध विद्वान राजेन्द्रमान वज्राचार्य लगायतं गद्यगुरुया जीवनी, वय्कःया व्यक्तित्व व योगदानया विषययात कयाः चर्चा यानादीगु खः ।