समाजसेवी डंगोलया लुमन्तिइ श्रद्धाञ्जली सभा

यल (नेपालभाषा टाइम्स) – ख्वनाया नांजाःम्ह समाजसेवी मदुम्ह देवबहादुर डंगोलया लुमन्तिइ श्रद्धाञ्जली सभा जुल । ख्वना सुधार समिति, लिधंसा पासा पुचः व ख्वनामि पासा पुचःया मंकाः ग्वसालय् समाजसेवी डंगोलया लत्याया पुण्य तिथिइ लाकाः उगु श्रद्धाञ्जली सभा जूगु खः । स्थानीय समाजसेवी शिवलाल डंगोलया सभापतित्वय् जूगु ज्याझ्वलय् यल महानगरपालिकाया प्रमुख चिरिबाबु महर्जनं मदुम्ह डंगोल ख्वनाया जक मखसे नेपाः देय्या हे छम्ह हनेबहम्ह व्यक्तित्व जूगु विचाः प्वंकादिल ।

ज्याझ्वलय् राजभाई जकःमिं च्वयादीगु व जुगल डंगोलं लसय् हनादीगु व सानुबाबु महर्जन, तेजवती जोशी, रत्नशोभा महर्जन, उत्तम महर्जनं सः बियादीगु मदुम्ह समाजसेवी डंगोलया व्यक्तित्वयात कयाः च्वयातःगु म्येँया म्युजिक भिडियो नं यल मनपा प्रमुख महर्जनं पितब्वज्या यानादीगु खः ।

ज्याझ्वलय् यल मनपाया उपप्रमुख गीता सत्याल, वडा नं. १९ या वडाअध्यक्ष रविन्द्र महर्जन, कृष्णभक्त महर्जन, कृष्णहरि डंगोल, पद्मबहादुर डंगोल लगायत थीथी व्यक्तित्वपिंसं मदुम्ह डंगोलया थीथी पक्षयात कयाः नुगःखँ तयादीगु खः । ख्वनाया हे जितापुर गन्धकुटी विहारय् जूगु ज्याझ्वलय् मदुम्ह वय्कःया नामं छगू अक्षय कोष नं नीस्वनेगु ज्या जूगु खः ।