‘अय्लाः लू वया…’ या भ्युअर्स झिगू लाख थ्यन

येँ (नेपालभाषा टाइम्स)- वंगु मोहनि न्ह्यवंनिसें चर्चाय् वःगु नेपालभाषाया म्ये ‘अय्लाः लू वया..’ या भ्युअर्स १० लाख थ्यंगु दु । मुक्कं १३ न्हुया दुने थ्व म्येया भ्युअर्स ल्याः युटुयुबय् १० लाख स्वयां अप्वः थ्यंगु खः ।

ख्वनाया रोजमान महर्जनया शब्द व संगीत दुगु थ्व म्येयात गगनराज डंगोलया निर्देशनय् म्युजिक भिडियो दयेकूगु खः । लोक लसय् दोहरी शैलीं हालातःगु थ्व म्येया गायक निशा देशार व रोजमान महर्जन खः ।

म्युजिक भिडियोय् कलाकारपिं मनोज महर्जन व नेरिशा महर्जन लगायतं अभिनय यानातःगु दु । वय्कःपिनिगु हे अभिनय दुगु नेवाः म्ये ‘माया यायेगु त्वःते मखु…’ नं थ्व स्वयां न्ह्यः अथे हे लोकंह्वाःगु खः ।

‘अय्लाः लू वया…’ थौंकन्हय् टिकटकय् नं उतिकं हे लोकंह्वानाच्वंगु दु । नेवाः लगायत आपालं गैर नेवाःतय्सं समेत थ्व म्येया टिकटक दयेकाः पोष्ट यानाच्वंगु दु । लोकंह्वाःगु म्ये शकम्बरीया कलाकार शकम्बरी, नांजाःम्ह डान्सर कविता नेपालीं समेत थ्व म्येया टिकटक दयेकूगु दु ।