सरकारयात खबरदार यायेत लखौं मनूत सतकय् (किपा व भिडियाे स्वयादिसँ)

नेपालभाषा टाइम्स
किपा-तेज महर्जन

येँ- गुथि विधेयक विरुद्ध सरकारयात खबरदारी यायेत लखौं मनूत सतकय् कुहां वःगु दु । थौं येँ, यल, ख्वप, थिमि, तोखा, किपू लिसें थीथी थासं वःपिं लखौं नेवाःत फिब्वख्यः (माइतीघर)य् जूगु खबरदारी प्रदर्शनय् सहभागी जूगु खः ।
सरकारं हःगु गुथि विधेयक विरुद्ध थौं माइतीघर शक्ति प्रदर्शन यायेगु ज्याझ्वः तयातःगु खःसां सरकारं मंगलवाः हे विधेयक लित कयाःगु घोषणा याःगुलिं थौंया विरोध प्रदर्शन खबरदारी प्रदर्शनय् हिउगु खः ।

माइतीघरय् प्रदर्शन लिसें जूगु सभाय् थीथी संघर्ष समितिया प्रतिनिधिपिंसं न्ववानाच्वंगु दु । विरोध सभाय् न्ववाःपिं सकसिनं गुथि विधेयक विरुद्धया आन्दोलन क्वचाःगु मदुनि धाःगु दु । थौंया प्रदर्शन खबरदारी प्रदर्शन जूगु, यदि हाकनं थज्याःगु विधेयक हल धाःसा तःधंगु प्रदर्शन जुइगु ख्याच्वः सभाय् न्ववाःपिंसं धाःगु दु । सरकारं आः विधेयक लित कयाः नेवाःतय्त झंगः लायेत जक स्वःगु धासें गुथि विधेयक खारेज हे यायेमाःगु माग याःगु खः ।

सभाय् गुथि विधेयकया विरोधय् कुहां वयाच्वंगु थीथी संघर्ष समितिलिसे समन्वय यानाः सहलह लिपा छन्हु निन्हु हे थप कार्यक्रम बीगु जानकारी नं बिउगु दु ।

थौंया प्रदर्शनय् येँ, यल, ख्वप, थिमि, किपू, तोखा आदि थासं यक्व हे ल्याय्म्ह ल्यासेत सतकय् कुहां वःगु खनेदुगु खः । थ्व खबरदारी प्रदर्शनय् कलाकारत योगेश्वर अमात्य, संजय श्रेष्ठ, भीम तुलाधर, बबिन प्रधान आदिपिं नं एक्यबद्धता क्यनेत माइतीघरय् थ्यंगु खः । अथेहे थिमि, ख्वप, तोखां वःपिं प्रदर्शनकारीतय्सं लाखे सहित साँस्कृतिक बाजं नं ज्वनावःगु खः ।

प्रदर्शनय् सहभागीपिंसं गुथि विधेयक खारेज यायेमाःगु माग यासें सः थ्वयेकूगु खः ।

गुथि विधेयक विरुद्ध छवाः न्ह्यव जूगु प्रदर्शनय् लाठी प्रहार याःपिं प्रहरी धाःसा थौंया प्रदर्शन तसकं नगन्य जक खनेदुगु दु । प्रहरीं निषेधित क्षेत्र सिंहदरबार व वानेश्वरय् जुलुस सहित धाःसा छ्वयाच्वंगु मदु । अथेखःसां थिमि, ख्वपं वःगु र्यालीयात धाःसा वानेश्वरं हे छ्वयाहःगु खः ।