गुथि विधेयक सुझाव समिति नीस्वंगुलिं देय् दबूया आपत्ति

नेवाःतय् राष्ट्रिय संगठन नेवाः देय् दबूपाखें मन्त्रीस्तरीय निर्णयपाखें गुथि सम्बन्धी विधेयकया सुझाव बीत नीस्वंगु समिति प्रति आपत्ति प्वंकूगु दु । देय् दबूया नायः नरेश ताम्राकारं मंगलवाः छगू पिथंसें माननीय जीवनराम श्रेष्ठया संयोजकत्वय् गुथि विधेयकया सुझाव बीत समिति नीस्वंगु बुखँ प्रति दबूया गम्भीर ध्यानकार्षण जूगु खँ न्ह्यथनादीगु दु ।

‘कारोना भाइरसया महामारीं फुक्कं देय् हे लकडाउन जूगु अवस्थाय् गुथि विधेयक सम्बन्धी सल्लाह कायेत समिति नीस्वंगु प्रति नेवाः देय् दबूया आपत्ति दु’, विज्ञप्ति न्ह्यथनातःगु दु ।

गुथियात स्वायत्त संस्था कथं तयातयेमाःगु धकाः याःगु आन्दोलनया भावनायात सरकारं बेवास्ता यासें थज्याःगु अवस्थाय् सरकारां बदनियत ढंगं समिति नीस्वनाः आन्दोलनरत सरोकारवालातय् भावनाय् कुठाराघाट याःगु खँ नं विज्ञप्तिइ न्ह्यथनातःगु दु ।

अथेहे समिति सरोकारवाला पक्षया प्रतिनिधित्व मयाइगु एकपक्षीय जूगुलिं अज्याःगु समितिया औचित्य मदइगु व थज्याःगु अवस्थाय् सरोकारवालातय्सं आवश्यक सुझाव नं बीमफइगुलिं सुझाव समिति दयेकेगु निर्णय तुरुन्त लितकायेत नं देय् दबूलिं माग याःगु दु ।