नेपालभाषय् ‘कवाली’ म्येँया म्युजिक भिडियोया पितब्वज्या
येँ(नेपालभाषा टाइम्स)÷उर्दू संगीतया अतिकं लोकंह्वाःगु कवाली म्येँ नेपालभाषाया संगीत ख्यलय् नं दुहां वःगु दु । उर्दू संगीतय् बिस्कं पह व सवाः दुगु कवाली पहया नेपालभाषाया म्येँया म्युजिक भिडियो हालय् पितब्वज्या याःगु दु ।
नेपालभाषा सांगीतिक ख्यलय् न्हूगु पहः व सवाः बीकथं ‘मुसुक्क न्हिलाः ….’ बोलया कवाली म्येँया म्युजिक भिडियो पितब्वज्या याःगु खः । थुगु म्येँय् झिम्ह कलाकारया सः दुथ्यानाच्वंगु दु । नेपालभाषा सांगीतिक ख्यलय् अतिकं नांजाःपिं म्येँ हालामिपिं कविता जोशी, सुरेश प्रधानलिसें लिपांगु इलय् थ्व ख्यलय् थःगु बिस्कं म्हसीका बीत ताःलाःपिं मय्जु सुमन मानन्धर, सबिना मानन्धर, रोविन्सन कंसाकारनापं सर्मिष्ठा शाक्य, एलिना शाक्य, राजेश महर्जन, धर्म महर्जन व मोहन शाक्यं सः बियादीगु दु । चण्डेश्वर महर्जनं च्वयादीगु म्येँय् नील शाक्यं लसय् हनादीगु खःसा जीवित जल्मिं संगीत संयोजन यानादीगु खः ।
म्युजिक भिडियोय् संगीतकार नील शाक्य, नेहा मालाकार, सिमरन शाक्य, रुविका महर्जन, राजेश श्रेष्ठ, हसिना प्रधान, ममता ठाकुर, अनु ताम्राकार कंसाकार, सोफिया शाक्य, आनिया शाक्यलिसें मेपिं आपालं कलाकारं अभिनय यानादीगु दु ।
विश्वास वज्राचार्यं निर्देशन यानादीगु म्युजिक भिडियोया छायाँकन अभिषेक वज्राचार्यं व सम्पादन आक्रिस्ट शाक्यं यानादीगु खः । निसिला शाक्यं कोरियोग्राफी यानादीगु म्युजिक भिडियोया मुक्कं छायाँकन एम्बियन्स लाउन्जय् याःगु खः ।
ज्याझ्वलय् म्येँ च्वमि महर्जन, संगीतकार शाक्य, निर्देशक वज्राचार्य, कलाकार कंसाकारलिसें विजयरत्न असंबरे, संगीतकार, कलाकारलिसें निर्देशक रामकृष्ण खड्गी, पेजथ्री बाःछि पौया सम्पादक दर्शनवीर शाक्यलगायतं नुगःखँ तयादीगु खः ।
LEAVE YOUR COMMENTS