नेपालमण्डल टेलिभिजनया नवनिर्वाचित संचालक समितिया म्हसीका व लसकुस ज्याझ्वः

यल (नेपालभाषा टाइम्स) – नेपालमडण्डल टेलिभिजनया नवनिर्वाचित संचालक समितिया म्हसीका व लसकुस ज्याझ्वः थनया भोलध्वाखाय् च्वंगु ज्यापु समाजया भवनय् वंगु शनिवाः जुल । संचालक समितिया नवनिर्वाचित नायः रमेश महर्जनया सभापतित्वय् जूगु ज्याझ्वलय् मूपाहांकथं शिक्षा, विज्ञान व प्रविधिमन्त्री कृष्णगोपाल श्रेष्ठ झायादीगु खः ।

ज्याझ्वलय् मूपाहां मन्त्री श्रेष्ठं झी धइगु भावना तयाः ज्या याये फत धाःसा समुदाय न्ह्याः वनेत नं सफल जुइ धासें भाषा, कला, संस्कृति संरक्षणया निंतिं सकलें जायेत वय्कलं इनाप यानादिल । लिसें वय्कलं नेवाः भाय्, कला, संस्कृति लगायत थीथी पक्षया प्रचार प्रसारय् टेलिभिजनं म्हिचा वयाच्वंगु भूमिकायात च्वछायादिसें न्हूगु संचालक समितियात भिंतुना नं बियादिल ।

ज्याझ्वःया सभापतिलिसें टेलिभिजनया अध्यक्ष महर्जनं टेलिभिजनया थौंया अवस्थाय्तक थ्यंकेत थःथःगु थासं भूमिका म्हितादीपिं व योगदान बियादीपिंत सुभाय् देछासे वइगु दिनय् नं थुकथं हे सहकार्य याना वनेत इनाप यानादिल । वाब्मय शताब्दीपुरुष डा. सत्यमोहन जोशी, विशिष्ट पाहांपिं यल महानगरपालिकाया प्रमुखलिसें उपत्यका मेयर फोरमया उपाध्यक्ष चिरिबाबु महर्जन, तोखा नगरपालिकाया उपप्रमुख ज्ञानीमाया डंगोल लगायतं न्हूगु संचालक समितिया भिंतुना देछासे टेलिभिजन म्हिता वयाच्वंगु भूमिका वइगु दिनय् सहकार्य याना वनेगु खँय् थःथःगु नुगःखँ धयादीगु खः ।

न्हूगु संचालक समितिया प्रतिनिधित्व यासें नांजाःम्ह उद्योगपति पद्मज्योतिं नेवाः भाय्, कला, संस्कृति लगायतया थीथी पक्षया संरक्षणया निंतिं तःधंगु योगदान बियाच्वंगु टेलिभिजनय् थःपिं नं संलग्न जुइ खंगुलिं लसता प्वंकादिल । ज्याझ्वलय् यलया प्रहरी प्रमुख एसएसपी किरण वज्राचार्य, ललितपुर उद्योग वाणिज्य संघया नव निवार्चित अध्यक्ष मनोजबहादुर न्याछ्यो, महासचिव रूपकमान महर्जन, संघया पूर्व अध्यक्षपिं कृष्णलाल महर्जन, अजरमान जोशी, थ्रिस्टार क्लबया अध्यक्ष अरूणमान जोशी, नेपालभाषा मंकाः खलः यलया नाय ऋषिप्रसाद श्रेष्ठ, यलया जातीय समाजया नायः प्रतिनिधि, टेलिभिजनया सल्लाहकार, पूर्व अध्यक्ष, प्रतिष्ठित व्यक्तित्व, पत्रकार लगायतया उपस्थिति दुगु खः ।

उगु इलय् नवनिर्वाचित संचालक समितिया पदाधिकारी दुजःपिंत निर्वाचन समितिया रोशन बजिमय, सुरेन्द्र श्रेष्ठ व सानु डंगोलं दसिपौ नं लःल्हानादीगु खः ।

नेपालभाषा टाइम्स

च्वमिया मेमेगु

• चित्तरन्जन नेपालीयात लुमंकल
• मतया तार भूमिगत यायेगु ज्या बेवारिस
• निम्ह साहित्यकारया थौं बिचाः मुँज्या
• एमालेया संकल्प यात्रायात पहिचानवादीया हाथ्या
• शरणार्थी काण्डय् गुम्हेसित कुना हे तइगु