‘नेपाल अध्यक्ष जुइत हथाय्चाल’
येँ -एमाले कुचा थलाः माधव नेपाल पुचलं न्हूगु पार्टी गठन यायेवं अध्यक्ष केपी ओलीं विरोध शुरु यानादीगु दु । वय्कलं माधव नेपालं थः अध्यक्ष जुइत हे जक पार्टी कुचाथःगु द्वपं बिसें नेपालयात पार्टीया निम्हम्ह अध्यक्ष दयेके धकाः धयां नं माने मजुसे मेगु पार्टी दयेकाः अध्यक्ष जूवंगु खँ कनादीगु दु ।
म्हिगः ख्वपय् जूगु छगू ज्याझ्वलय् न्ववासें अध्यक्ष ओलीं नेता नेपालया दल दर्ता यायेत ग्वाहालि याःपिं नेतातय्त पार्टीइ लिहां वयेत इनाप नं यानादिल । वय्कलं धयादिल, ‘दल दर्ताया निवेदनं थःपिनिगु नां लित कयादिसँ, झीसं दयेकागु पार्टीइ झासँ, नापं ज्या याये । सुयागुं व्यक्तिगत स्वार्थ, अहंकार, कुण्ठा व इष्र्याया नितिं पार्टी व आन्दोलनयात कमजोर याये मजिउ ।’
निर्वाचन आयोगय् नेता नेपालं बिउगु धलखय् थःगु नां मदुगु घोषणा यायेत मछिंकेम्वाः धासें उगु धलखय् थःगु नां मदुगु खँ याउँक धयाः थःगु भविष्य सुरक्षित यायेत नं वय्कलं इनाप यानादिल ।
आःया सत्तारुढ गठबन्धनं एमाले तछ्यायेगु मनसाय तयाः अध्यादेश जारी याःगु धासें अध्यक्ष ओली आपत्ति प्वंकादिसें धयादिल, ‘एमाले तछ्यानाः कमजोर यायेगु गलत मनसाय तयाः गुलि मनू खाःगु खः उलि प्रतिशत जक तयाः अध्यादेश जारी यात ।’
म्हिगः कार्यकर्तायात सम्बोधन यायेगु झ्वलय् वय्कलं वरिष्ठ नेता नेपालयात आपालं द्वपं बियादीगु दु । नेपाल ताः ई तक पार्टीया नेतृत्व याःगु व नेतृत्व यायेगु झ्वलय् पार्टी कय्कुनाः कचौरा थें जूगु द्वपं बियादिल । नेपालया कार्यकालय् एमाले सतक व संसद निगुलिं मोर्चाय् कय्कुंगु धासें नेपाल पार्टी नेतृत्व दुगु इलय् व सरकारय् दुगु इलय् पार्टीयात मदयेकेत भूमिका म्हितेगुली केन्द्रित जूगु द्वपं नं अध्यक्ष ओलीं बियादीगु दु ।
नेता नेपालयात थप द्वपं बिसें अध्यक्ष ओलीं धयादिल, ‘नेकपा एमालेया सरकार प्रतिगामी खः, एमालेया सरकार क्वःथलाः शेरबहादुर देउवाया नेतृत्वय् सरकार दयेक दयेमाः धकाः राष्ट्रपतिया थाय् वनाः हस्ताक्षर यायेगु, सर्वोच्च अदालतय् नं ओलीया सरकार अपदस्थ यायेमाः, शेरबहादुर देउवायात प्रधानमन्त्री नियुक्ति यायेमाः धकाः वंम्ह खः ।’
सरकारं एमाले तछ्यायेगु नितिं हे राजनीतिक दल सम्बन्धी अध्यादेश हःगु व अध्यादेश हयेगु झ्वलय् नेपाल पक्षय् गुलि प्रतिशत सांसद व केन्द्रीय दुजः दु धइगु ल्याःचाः यानाः दल विभाजनया निंतिं उगु हे प्रतिशत न्ह्यथंगु खँ नं ओलीं धयादिल ।
निगूगु पुस्तां माधवयात त्वःतल
एमाले त्वःताः न्हूम्ह पार्टी चायेकादीम्ह वरिष्ठ नेता माधव नेपालयात अन्तिमय् वनाः आपालं नेतातय्सं त्वःतूगु कारणं वय्कः थःगु पार्टी चले यायेत आः समर्थ जुइगु खः लाकि मखु धइगु न्ह्यसः पिहां वःगु दु । पार्टीया खास यानाः निगूगु पुस्ताया नेतातय्सं वय्कःयात साथ त्वःता वंगु खः । निगूगु पुस्ताया नेतातय्सं एमाले दुने हे च्वनाः संघर्ष यायेमाःथाय् पार्टी विभाजन यायेगु पाय्छि मजू धइगु बिचाः तयेगु यानाच्वंगु दु । तर माधव नेपालयात त्वःताः पिहां वःपिं नेतातय्त एमाले दुने छु स्थान दइ धइगु खँ स्पष्ट जूगु मदुनि ।
LEAVE YOUR COMMENTS