ने. सं. ११४४ कौलाथ्व तृतीया -

न्यूयोर्कय् नेपाःमितय् प्रदर्शन

दुने प्रधानमन्त्रीया भाषण, पिने सतक विस्तार विरुद्ध नाराबाजी

येँ – येँय् लगायत देय्या थीथी थासय् जुयाच्वंगु अनधिकृत सतक विस्तारया विरुद्ध अमेरिकाया न्युयोर्कस्थित संयुक्त राष्ट्र संघया ज्याकू पिने प्रदर्शन जूगु दु । राष्ट्र संघ ज्याकू पिने नेपाःमितय्सं प्रदर्शन यानाच्वंगु इलय् दुने राष्ट्र संघया महासभाय् नेपाःया प्रधानमन्त्री केपी ओलीं सम्बोधन यानाच्वनादीगु खः ।अमेरिकाय् च्वंगु नेपाल आदिवासी जनजाति महासंघ, युनाइटेड प्रेसर एण्ड प्रोटेस्ट ग्रुप लगायत मेमेगु नं थीथी संघ संस्था जानाः अन मंकाः कथं प्रदर्शन याःगु खः ।

थ्व प्रदर्शन न्हिनय् करिब स्वघौ तक जारी जूगु खः । प्रदर्शनकारीतय्सं नेपालय् सतक विस्तारया नामय् सरकारं अन्तर्राष्ट्रिय श्रम संगठनया धारा १६९ उल्लंघन यानाः स्थानीय जनतायात विस्थापित यायेगु ज्या यानाच्वंगु, स्थानीय जनतायात सुुकुम्बासी दयेकेगु ज्या यानाच्वंगु धासें उकियात पनेत माग यानातःगु प्लेकार्ड ब्वया तःगु खः ।

लिसें उमिसं देय्या सर्वोच्च अदालतं तकं जनतायात मुआब्जा मबिसे थने दइ मखु, विकल्प मबिसे सुयां नं छेँ खाली याके दइ मखु, स्थानीय जनताया सांस्कृतिक पर्व प्रभावित याये दइ मखु धकाः आदेश बीधुंकाः तकं सरकारं उकियात वेवास्ता यासें छेँ थुनेगु ज्या यानाच्वंगु द्वपं नं बिउगु खः । अथे हे प्रदर्शनकारीतय्सं जनतायात पहिचानया अधिकार बीमाःगु, पहिचान समेत दुगु ११ प्रदेशया संघीयता लागू यायेमाःगु नारा च्वया तःगु ब्यानर नं अन प्रदर्शन याःगु खः ।