पवित्र व न्ह्यूया मां मंत

येँ – संसफोया केन्द्रीय दुजः लिसें नेवाः न्ह्यलुवा पवित्र वज्राचार्य व नांजाःम्ह संगीतकार न्हू वज्राचार्य अले कलाकार नगीना जोशीया मां साहित्यकार कृष्णदेवी वज्राचार्य मंत । वय्कः ८८ दँ दुम्ह खः । वय्कःया सीम्हयात म्हिगः अन्तिम श्रद्धांजलिया लागिं ओमबहालय् तःगु खःसा वयां लिपा टेकुदोभानय् अन्त्येष्टी याःगु खः ।

मदुगु कृष्णदेवीया जहान परमानन्द वज्राचार्य नेपालभाषाया नांजाःम्ह साहित्यकार खः । वय्कःया छय्पिं लसता जोशी व भिन्तुना जोशी नं नांजाःपिं कलाकार खः । मदुम्ह वज्राचार्ययात तःधीम्ह काय पवित्र वज्राचार्यं मि तयादीगु खः । चीधिम्ह काय न्ह्यू वज्राचार्यं न्हापा बौयात मि तयादीगुलिं मांयात तःधीम्ह कायं मि तःगु खँ धाःगु दु ।