समाजसेवी डंगोलया नामं छात्रवृत्ति इन

ख्वना – ख्वनाया नांजाःम्ह समाजसेवी मदुम्ह देवबहादुर डंगोलया नामं झिम्ह विद्यार्थीयात छात्रवृत्ति इउँगु दु । समाजसेवी डंगोलया लुमन्तिइ पलिस्था यानातःगु स्व देवबहादुर डंगोल स्मृति कोषपाखें उगु छात्रवृत्ति लःल्हाःगु खः ।

ज्यापु महागुथिया सल्लाहकारलिसें पुलांम्ह नायः डंगोलया नामं स्वनातःगु कोषपाखें ख्वनाया युवा प्रतिभा विद्यालयया न्याम्ह व ख्वना माध्यमिक विद्यालयया न्याम्ह यानाः झिम्ह जेहेन्दार विद्यार्थीयात छात्रवृत्ति लःल्हाःगु खः ।

थनया युवा प्रतिभा विद्या मन्दिरय् शनिवाः छगू ज्याझ्वःया दथुइ यल महानगरपालिका वडा नं. २१या वडाअध्यक्ष रविन्द्र महर्जनं छात्रवृत्तिकथं विद्यार्थीतय्त दछिया शैक्षिक सामाग्रीनापं दां लःल्हानादीगु खः ।

छात्रवृत्ति लःल्हासें वडाअध्यक्ष महर्जनं समाजसेवी मदुम्ह डंगोलया नामं स्वनातःगु कोषया निंतिं माःगु ग्वाहालि यायेगु बचं बियादिल । वय्कलं कोषपाखें शिक्षा व स्वास्थ्य ख्यःया निंतिं न्ह्याकीगु ज्याय् ग्वाहालि यायेकथं वडापाखें नं माःगु योगदान व व्यवस्थापन यायेगु जुइ धयादिल ।

ज्याझ्वलय् कोषया नायः पद्मबहादुर डंगोलं कोषपाखें ज्या शुरु यायेधुंगु धासें आः मदिक्क थीथी ज्याझ्वः याना वनेगु जुइ धयादिल । कोषपाखें याकनं हे मदुम्ह डंगोलया लुमन्तिइ स्मारिका पिथनेगु नं तयारी यानाच्वंगु दु ।