कोलोराडो नेवाः खलःया भिंतुना कालबिल व न्हूधाः
येँ(नेपालभाषा टाइम्स)-नेपाल संवत् ११४५ न्हूदँया लसताय् अमेरिकाया कोलोराडोय् च्वंपिं नेवाःतय्सं नं ¥याली पिथँसे भिंतुना कालबिल ज्याझ्वः याःगु दु । कोलोराडो नेवाः खलःया ग्वसालय् जूगु ज्याझ्वलय् ब्वति कयादीपिंसं थवंथवय् न्हूदँया भिंतुना कालबिल याःगु खःसा उगु इलय् खलःया न्हूधाः नं याःगु खः ।
खलःया नायः भूषणलाल श्रेष्ठया सभापतित्वय् जूगु ज्याझ्वलय् मूपाहांकथं झायादीम्ह पूर्वसचिव, म्येँ हालामिलिसें मिसा नेतृ उर्मिला श्रेष्ठं त्वाःदेवाय् मत च्याकाः उलेज्या यानादीगु खःसा नायः श्रेष्ठं लसकुस यासें ज्याझ्वःया बारे कुलादीगु खः ।
नेपाल संवत्या प्रणेता राष्ट्रिय विभूति शंखधर साख्वाःया किपाय् स्वांमाः क्वखायेकाः न्ह्याःगु ज्याझ्वलय् नेपाल संवत् न्हूदँ राष्ट्रिय समारोह समिति ११४५या नायः राजेन्द्रप्रसाद श्रेष्ठ अमेरिकाया कोलोराडोय् नं नेपाल संवत् हंगुलिं लसता प्वंकुसे नेपाल संवत्या महत्वयात कयाः बियादीगु भिडियो सन्देश क्यंगु खः ।
ज्याझ्वलय् मूपाहां, पाहांलिसें मेपिं वक्तापिंसं नेपाल संवत् ११४५ न्हूदँया भिंतुना बियादिसें राष्ट्रिय विभूति शंखधर साख्वाःया योगदान व वय्कःया देनयात कयाः नुगःखँ तयादीगु खः । उगु इलय् मूपाहां श्रेष्ठलिसें हेल्पिङ ह्याण्डया अध्यक्षलिसें समाजसेवी नारायण श्रेष्ठ, खलःया संस्थापक नायः प्रेमकाजी श्रेष्ठं, नेपाल बार एशोसियसनया पुलांम्ह अध्यक्षलिसें वरिष्ठ अधिवक्ता विश्वकान्त मैनाली लगायतं न्हूदँया भिंतुना देछासे नुगःखँ तयादीगु खः ।
उगु इलय् नेवाः कला, संस्कृति ल्यंकेगु नापं विश्वय् म्हसीकेग, नेपाःमि समुदाययात एकतावद्ध यायेगु ज्याय् योगदान बिउगु धासें कोलोराडोय् सक्रिया नेपाली घर संस्थायात हनेज्या नं याःगु खः । ज्याझ्वलय् नेपाली घरया गंगा चौलागाइँ व सामाजिक संजालपाखें नेपाःमितय् गतिविधि बारे जानकारी बीगु ज्याय् भूमिका म्हितूगु धासें स्वतन्त्र पत्रकार नातिबाबु भट्टयात बेतालिं चिकाः हनापौ लःल्हाःगु खः ।
थुकथं हे ज्याझ्वःया झ्वलय् कोलोराडो नेवाः खलःया न्हूगु ज्यासना पुचःया नं ल्यज्या याःगु खः । न्हूधाःकथं भूषणलाल श्रेष्ठ नायः, निवर्तमान नायः प्रेमकाजी श्रेष्ठ, मनोजकाजी तुलाधर न्वकु, संजय शाक्य मूछ्याञ्जे, नारायणप्रसाद दुवाल छ्याञ्जे, रोशन महर्जनयात दांभरिं ल्यःगु दु । थुकथं हे न्हूगु ज्यासना पुचःया दुजलय् सुरेश श्रेष्ठ, जोशन श्रेष्ठ, राजन जोशी, मनिष ताम्राकारयात ल्यःगु दुसा सुरेन्द्र महर्जनयात सांस्कृतिक सचिव, शर्मिला प्रधानयात इभेन्ट अफिसर, अनिल वज्राचार्ययात पब्लिक रिलेसन अफिसर ल्यःगु दु ।
संस्थाया सल्लाहकारय् भुवनकृष्ण श्रेष्ठ, धर्मराज श्रेष्ठ, रमिता तुलाधरयात मिसा कवःया कजि, मोहनकाजी श्रेष्ठयात आईटी कवःया कजि, बिकेश प्रधानयात ल्याय्म्ह कवःया कजि रामगोपाल श्रेष्ठयात लय्ताःच्यः (स्वयंसेवक) कजि ल्यःगु दु । ज्याझ्वलय् खलःपाखें वंगु येँयाःपुन्हिकुन्हु जूगु ज्याझ्वःया निंतिं कुमारिया खः दयेकेगु ज्याय् विशेष योगदान बियादीपिं नापं संस्थाय् निगू कार्यकालतक ज्यासना पुचलय् च्वनादीपिंत नं मतिनाया चिं लःल्हाःगु खः ।
ज्याझ्वःया दकलय् लिपा स्थानीय कलाकारतय्सं नेवाः म्येँ, हुलाप्याखंलिसें सांगीतिक ज्याझ्वः न्ह्यब्वःगु खः ।
LEAVE YOUR COMMENTS