थिमिइ नवदुर्गा गं प्याखं क्वचाल

थिमि- मध्यपुर थिमिइ वंगु थिंलाथ्व पुन्हि (यःमरिपुन्हि)निसें क्यना वयाच्वंगु ख्वपया नवदुर्गा द्यःया गंप्याखं क्वचाःगु दु । मध्यपुर थिमि नगरपालिकाया ग्वाहालि व सहकार्यय् धार्मिक व सांस्कृतिक महत्वं जाःगु प्याखं लिपांगु न्हि आरति व पुजा यानाः क्वचायेकूगु खः ।

यःमरिपुन्हिकुन्हु थिमिया दिगु त्वालं शुरु जूगु नवदुर्गा द्यःया गंप्याखं अनंलि चपाच्व, भुलांख्यः, बालकुमारि, दथुत्वाः, थिमि लाय्कू, नगदेश, बोडे, गाम्चा, दथु त्वाः, तछुत्वाः, पोबु, वामुने आदि थीथी थासय् क्यंगु खः ।

दकलय् लिपांगु न्हि बालकुमारिइ प्याखं क्यनाः क्वचायेकेगु झ्वलय् न्या लाकेगु, सिम्हा, दुम्हा न्या लाकेगु, श्वेत भैरव व महाकाली, श्वेत भैरवया न्या लाकेगुलिसें आरति व पुजा यानाः जात्रा क्वचायेकूगु खः ।

नवदुर्गा द्यःया गंप्याखं सुरक्षाया कारणं वंगु करिब ११ दँ तक थिमिइ क्यनेगु ज्या बन्द जुयाच्वंगु खःसा जनप्रतिनिधि वयेधुंकाः ०७५ निसें हाकनं थुकियात निरन्तरता बिया हःगु खः ।

जात्राया लिपांगु दिं मध्यपुर थिमि नगरपालिकाया प्रमुख मदनसुन्दर श्रेष्ठ, उपप्रमुख अञ्जना मधिकःमि, थीथी वडाया वडाअध्यक्षलिसें जनप्रतिनिधिया उपस्थिति दुगु खः ।