ने. सं. ११४६ अनलाथ्व षष्ठी -

सिन्धुलीया मरिण गाउँपालिकाय् नेवाः संस्कृतिया प्रशिक्षण

येँ (नेपालभाषा टाइम्स) – सिन्धुली जिल्लाया मरिण गाउँपालिका वडा नं. ६ स्थित छापय् नेवाः कला, संस्कृति, इतिहास, संस्कार विषयय् प्रशिक्षण ज्याझ्वः जूगु दु । नेवाः देय् दबू मरिण गाउँपालिका समितिया ग्वसालय् मरिण गाउँपालिकाया आर्थिक ग्वाहालिइ वंगु जेठ २ व ३ गते निन्हुयंकं उगु प्रशिक्षण ज्यााझ्वः जूगु खः ।

नेवाः समुदायया भाषा, संस्कृति, रीति, परम्परा व ऐतिहासिक म्हसीकायात ल्यंकेगु ल्याखं उगु प्रशिक्षण ग्वसाः ग्वःगु खः । देय् दबू मरिण गाउँपालिकाया नायः कृष्णकुमार श्रेष्ठया सभापतित्वय् जूगु ज्याझ्वलय् मरिण गाउँपालिकाया अध्यक्ष विमर्श मोक्तान मूपाहांकथं व उपाध्यक्ष विमला माझी विशेष पाहांकथं झायादीगु खः । ज्याझ्वलय् तोखाया सामाजिक अभियन्तालिसें पुजारी देवराज डंगोलं नेवाः समुदायय् प्रचलनय् दुगु पुजा विधि व सांस्कृतिक अभ्यास बारे जानकारी बियादीगु खः ।

देय् दबूया पुलांम्ह केन्द्रीय दुजः उपेन्द्र प्रधानं नेवाः जातिया संस्कार, नेपालभाषा, लिपिया महत्व, छ्यलाबुला व च्वयेगु विधि बारे प्रशिक्षण बियादीगु खः । देय् दबू स्वनिगः विशेष प्रदेशया वरिष्ठ न्वकु गणेशमान श्रेष्ठं नेवाः समुदायया नखःचखः, बाजं व सांस्कृतिक परम्परा व महत्व बारे प्रशिक्षण बियादीगु खः ।

ज्याझ्वलय् नवासें मूपाहां मोक्तानं भाषा, कला, संस्कृति, संस्कार धइगु समुदायया म्हसीकाया आधार खः धासें मौलिक संस्कृति संरक्षणया निंतिं स्थानीय तहं थुकथंया ज्याझ्वःयात निरन्तरता बिया वनेगु जुइ धयादिल । देय् दबूया संरक्षक नरेश ताम्राकारं नेवाः समुदायया इतिहास, नेवाःत थःगु मू थाय् बाय्पाखें विस्थापित जुइमाःगु कारण, भाषा, कला, संस्कृति, संस्कार, नखःचखः, रीति बारे विश्लेषणात्मक प्रस्तुति बियादीगु खः । लिसें वय्कलं ईलिसें मौलिक संस्कार, संस्कृतिइ वयाच्वंगु हिउपाः व उकिया संरक्षणया निंतिं समुदाय इलय् हे सचेत जुइमाःगु खँय् बः बियादिल ।

ज्याझ्वलय् देय् दबूया केन्द्रीय दुजः विनोदकुमार श्रेष्ठ, सिन्धुली जिल्ला नायः राजकुमार श्रेष्ठ लगायतं नेवाः समुदायया भाषा, संस्कृति, संस्कार व म्हसीका ल्यंकेया निंतिं मंकाः कुतः यायेमाःगु खँय् बः बियादीगु खः ।

गाउँपालिकाया प्रमुख प्रशासकीय अधिकृत महेश श्रेष्ठ, देय् दबू बागमति प्रदेशया मिसा छ्याञ्जे भद्रा राजभण्डारी, प्रदेश समितिया दुजःपिं कालिदास श्रेष्ठ, भानुभक्त श्रेष्ठ, गाउँपालिकाया न्हय्गू वडाया वडाअध्यक्ष, जिल्ला नायः राजकुमार श्रेष्ठ लगायतया पदाधिकारीपिनिगु उपस्थिति दुगु खः । निन्हुतक न्ह्याःगु प्रशिक्षणय् गाउँपालिकाया सछिस् वयां अप्वः स्थानीयया सहभागिता दुगु खः ।