न्यूयोर्कय् न्हूदँ व मंकाः म्हपुजा

येँ(नेपालभाषा टाइम्स)- अमेरिकाया थीथी राज्य व सहरय् च्वनाच्वंपिं नेवाःतय्सं न्हूदँ हनेगु झ्वलय् न्यूयोर्कय् च्वंपिं नेवाःतय्सं नं नेपाल संवत् ११४३ न्हूदँ हनेगु नापं म्हपुजा याःगु दु । न्यूयोर्कय् च्वनाच्वंपिं नेवाःतय् संस्था न्यूयोर्क नेवाः गुथिया ग्वसालय् न्हूदँ हनेगु व मंकाः म्हपुजा ज्याझ्वः जूगु खः ।

वंगु नेपाल संवत् ११४३ कछलाथ्व पारु, बुधवाः न्हूदँकुन्हु गुथि न्यूयोर्कया ग्वसालय् सांस्कृतिक बाजंलिसें ¥याली पिथंगु खः । सुथय् भिंतुना ¥याली पिथनेधुंकाः उकुन्हु हे नेवाःतय् मौलिक नखः म्हपुजा मंकाःकथं याःगु खः ।

न्यूयार्कय् च्वंगु ज्याक्सन हाइटस्थित डाइभरसिटी प्लाजाय् जूगु मंकाः म्हपुजाय् न्यूयोर्कस्थित नेपाली वाणिज्य दूतावासया काउन्सिलर गणेशप्रसाद अधिकारी मूपाहांकथं झायादीगु खः । ज्याझ्वलय् गुथि न्यूयोर्कया संस्थापक नायः आदित्य महर्जनं न्हूदँ, म्हपुजालिसें नेवाः संस्कार, संस्कृति व पर्वया महत्व बारे कनादीगु खः ।

थुगुसी जूगु मंकाः म्हपुजाय् करिब निसःया ल्याखय् मनूतय्सं ब्वति काःगु ज्याझ्वःया कजि हृदय तुलाधरं कनादीगु दु ।

नेवाः गुथि, न्यूयोर्कं दँय्दसं न्हूदँ हनेगु नापं मंकाः म्हपुजा यायेगु याना वयाच्वंगु दु । थुगुसीया ज्याझ्वः ताःलाकेत तुलाधरलिसें ज्यासना पुचःया दुजः कविना सिंहया संयोजकत्वय् छगू समिति नं नीस्वंगु खः ।