ज्येष्ठ नागरिकया निःशुल्क स्वास्थ्य परीक्षण

येँ – येँ महानगरपालिकां ज्येष्ठ नागरिकया निःशुल्क स्वास्थ्य परीक्षण शुरु याःगु दु । येँ मनपां सामाजिक सुरक्षा भत्ता कयाच्वंपिं सकलें ज्येष्ठ नागरिकयात उकथंया सेवा बीगु शुरु याःगु खः । येँ मनपां ज्येष्ठ नागरिकया स्वास्थ्ययात ध्यानय् तयाः सकतां कथंया ल्वय्या निःशुल्क परीक्षण न्ह्याकूगु खः ।

येँ मनपां थुगु अभियान येँ मनपा वडा नं. १५ पाखें शुरु याःगु खः । येँमनपा १५ वडापाखें ‘मेयर निःशुल्क स्वास्थ्य परीक्षण’ नां बियाः थुगु ज्याझ्वः न्ह्याकूगु खः । थ्व ज्याझ्वः अन्तर्गत सामाजिक सुरक्षा भत्ता कयाच्वंपिं सकलें ज्येष्ठ नागरिकया निःशुल्क स्वास्थ्य परीक्षणलिसें वासलय् २० प्रतिशत तक छ्यापं बीगु व्यवस्था नं शुरु यानागु मनपां न्ह्यथंगु दु ।

थ्व ज्याझ्वः अन्तर्गत न्हापांगु चरणय् येँ मनपा १५ वडा दुनेया करिब १६०० म्ह सामाजिक सुरक्षा भत्ता कयाच्वंपिं ज्येष्ठ नागरिकयात सेवा बीगु योजना दुगु येँ मनपाया प्रवक्ता ईश्वरमान डंगोलं जानकारी बियादिल । आःयात परीक्षणया रुपय् १५ वडां शुरु जूगु थ्व ज्याझ्वः बजेट, जनशक्ति व मेमेगु व्यवस्थापनय् नं सहजता वयेवं लिपा मेमेगु नं वडाय् न्ह्याका यंकेगु योजना दुगु प्रवक्ता डंगोलं कनादिल ।

येँ महानगर लागा दुने च्वंपिं सामाजिक सुरक्षा भत्ता कयाच्वंपिं ज्येष्ठ नागरिकयात लिपांगु इलय् थीथी ल्वचं कइगु समस्या जुइवं इमिगु स्वास्थ्य सहज जुइमा धइगु ल्याखं थुकथंया निःशुल्क ज्येष्ठ नागरिक स्वास्थ्य परीक्षण शुरु यानागु येँ मनपाया प्रमुख विद्यासुन्दर शाक्यं धयादिल ।

थ्व सेवा काइपिं ज्येष्ठ नागरिकयात ‘मेयर निःशुल्क स्वास्थ्य परीक्षण म्हसीका पौ’ नं बीगु जुइ । थुगु ज्याझ्वःया निंतिं शनिवाः हे येँ महानगरपालिकाया प्रमुख शाक्यं येँ मनपा १५ वडाय् च्वंगु सामुदायिक स्वास्थ्य सेवा परिषद्या नायः हरिगोपाल श्रेष्ठयात मासिक छगू लाखया दरं दछिया झिंनिगू लाखया चेक नं लःल्हानादीगु खः ।