येँ देय् पुनःनिर्माणय् दकलय् कमजोर

येँ – भुखाय् लिपाया पुनःनिर्माणय् देय्या राजधानी हे दकलय् कमजोर जूगु खँ सीदुगु दु । राष्ट्रिय पुनःनिर्माण प्राधिकरण जिल्ला आयोजना कार्यान्वयन इकाइयाकथं देय्या राजधानी येँ हे भुखाय् लिपाया पुनःनिर्माणय् दकलय् कमजोर अवस्थाय् दुगु खने दुगु खः ।

२०७२ बैशाख १२ गतेया भुखाचं अतिकं प्रभावित १४ गू जिल्लामध्ये दकलय् अप्वः ख्वातुगु वस्ती दुगु राजधानी सहर हे पुनःनिर्माणय् दकलय् लिउने लाःगु जक मखसे येँ जिल्लाया झिंछगू नगरपालिकामध्ये नं दकलय् अप्वः समस्या येँ महानगरपालिकाय् खने दुगु इकाइं न्ह्यथंगु दु ।

येँ जिल्लाय् शुरुइ याःगु सर्वेक्षण लिपा गुनासोपाखें थप जूगु लाभग्राहीया ल्याः ४८,५६८ दुगु इकाइया अनुदान व स्थानीय पूर्वाधारया अनुगमन तथा मू ल्यांकन विज्ञ राजकुमार पौडेलं कनादिल । वय्कलं बियादीगु जानकारीकथं भुखाय् लिपा जूगु शुरुया सर्वेक्षणय् ४२,४९९ भुखाय् पीडित लाभग्राहीया धलखय् लाःगु खःसा लिपा गुनासोपाखें ६,०६९ म्ह थप जुइवं थौंकन्हय् लाभग्राहीया ल्याः ४८,५६८ थ्यंगु दु ।

कुल लाभग्राहीमध्ये ८६ प्रतिशतं अनुदान सम्झौता याःगुलिइ उकथं सम्झौता याःपिं सकसिनं न्हापांगु किस्ता वापतया न्यय्द्वः तका दां नं बुझे याना कायेधुंकूगु दु । न्हापांगु किस्ता सकसिनं काःसां निगू किस्ता काःपिं करिब झिंच्याद्वः दुगु व छेँ दनेगु ज्या क्वचायेकाः वस्वंगूगु किस्ता काःपिं धाःसा झिंप्यद्वः जक दु ।

भुखाचं प्रभावित जिल्ला मध्ये येँ महानगरपालिका दुने दकलय् म्हो छेँ पुनःनिर्माण जूगु दु । येँ मनपा दुने भुखाय् लिपा ७,५६१ खा छेँ जक पुनःनिर्माण जूगु दु । भुखाचं अतिकं प्रभावित जिल्लामध्ये सिन्धुपाल्चोक पुनःनिर्माणय् दकलय् न्ह्यःने लाःगु दु । थन ६७,६०४ खा छेँ पुनःनिर्माणया ज्या क्वचायेधुंकूगु प्राधिकरणं न्ह्यथंगु दु ।