सरकार त्वःतेमाःगु बाबुरामया बिचाः

येँ – समाजवादी पार्टीया अध्यक्ष डा. बाबुराम भट्टराईं थःगु पार्टी सरकारं पिहां वयेमाःगु प्रस्ताव यानादीगु दु । समाजवादी पार्टीया म्हिगः च्वंगु संघीय परिषद्या बैठकय् अध्यक्ष भट्टराईं सरकार त्वःतेगु प्रस्ताव यानादीगु खः ।

सरकारया नेतृत्व याइगु पार्टी (नेकपां) छखे संविधान संशोधन यायेगु खँय् गुगुं नं कथंया चिउताः मतःगु व मेखे प्रदेश प्रमुखयात यकःति निर्णय यानाः चीकेगु ज्या याःगु धासें सरकारय् च्वनेगु औचित्य मदुगु खँ थःगु कार्यपत्रय् न्ह्यब्वयादीगु खः ।

अध्यक्ष भट्टराईं सरकारया नेतृत्व याइगु दलं सत्ता साझेदार दललिसे महत्वपूर्ण निर्णय यायेबलय् सरसल्लाह यायेमाःगु सत्ता सञ्चालनया सामान्य मर्यादाया तकं चिउताः मतःगु द्वपं बियादीगु खः ।

वय्कलं थःगु कार्यपत्रय् संघीय सरकारय् पार्टीया संलग्नता बारे गम्भीर समीक्षा यायेमाः धासें थ्व सन्दर्भय् सरकार व सरकार सम्बद्ध पार्टीलिसे वार्ता न्ह्याकेगु, निगू बुँदे सहमति कथं संविधान संशोधनया निंतिं संशोधन प्रक्रिया न्ह्याकेगु पहल यायेमाःगु खँ न्ह्यथनातःगु दु ।

परिषदया बैठक लिपा कार्तिक २९ व ३० गते च्वनीगु केन्द्रीय बैठक च्वनीगु जूगु दु । उगु बैठकय् सरकार त्वःतेगु वा मत्वःतेगु विषयसं गम्भीर सहलह जुइगु खँ धाःगु दु ।