संसफो व राजपाया एकता हल्ला जक

येँ – संसफो व राजपा एकीकरण जुइ धकाः खँ वःसां तत्काल एकता जुइगु सम्भावना धाःसा मदुगु खँ सूत्रं धाःगु दु । निगू पार्टी दथुइ एकताया निंतिं पौ कालबिल जुयाच्वंगु खःसां उकिं ठोस रुप धाःसा काये मफइगु खँ नं धाःगु दु ।

निगुलिं पार्टी दथुइ मार्ग निर्देशक सिद्धान्त हे फरक जुयाच्वंगुलिं तत्काल एकताया सम्भावना मदुगु खँ धाःगु दु । जनताया दथुइ पार्टी एकता यायेमाल धकाः सः थ्वयाच्वंगुलिं जक एकताया बारे पौ च्वयेगु ज्या जूगु व उकिया खास अर्थ मदुगु खँ धाःगु दु ।

संसफोया सहध्यक्ष राजेन्द्र श्रेष्ठं ‘नेपालभाषा टाइम्स’ लिसे खँ ल्हासें तत्काल एकताया सम्भावना मदुगु खँ कनादीगु दु । वय्कलं न्हापां राजनीतिक सिद्धान्तय् सहमति जुल धाःसा जक एकता प्रक्रिया न्ह्यःने न्ह्याः वनी धासें उकिया निंतिं मधेशवादी पार्टीत गुलि तक तयार जुइगु खः धइगु मू न्ह्यसः दनाच्वंगु खँ कनादिल ।

वय्कलं मधेशवाद धायेबलय् मधेशया निंतिं जक जुल अथे जुयाः राजपां दकलय् न्हापां संघवादयात स्वीकार यात धाःसा एकता प्रक्रिया न्ह्याः वनेफइ धयादिल । वय्कलं संघवाद जुल धाःसा हिमाल, पहाड व तराईया फुक्कं आदिवासी जनजाति व अल्पसंख्यक जनतायात नं कःघाये फइ धासें राजपां संघवाद स्वीकार यायेमाःगु बिचाः नं तयादिल ।