पन्तिइ मकर मेलाया तयारी शुरु
काभ्रे – थनया ऐतिहासिक वस्ती पन्तिइ थुगुसी ‘मकर मेला’ न्यायेकीगु जूगु दु । मेलाया निंतिं आवश्यक तयारी नं शुरु जूगु दु । प्रत्येक झिंनिदँय् छक्वः जुइगु थनया ऐतिहासिक व धार्मिक महत्वया ‘मकर मेला’या प्रवद्र्धन यायेगु ज्याझ्वःत जुयाच्वंगु दु ।
कोरोना संक्रमणया कारणं थगुने चैतनिसें थीथी नखःचखः, जात्रा, पर्व संस्कृति प्रभावित जुया वयाच्वंगु अवस्थाय् वंगु चैत बैशाखपाखे जनबहाः द्यः, बिस्काः जात्रा सहज रुपं संचालन जूसां मेमेगु जात्रा पर्व धाःसा अझं प्रभावित हे जुयाच्वंगु दु । उकिसनं लिपांगु इलय् कोरोना संक्रमितया ल्याः हाकनं अप्वया वनाच्वंगु दु । थज्याःगु अवस्थाय् पन्तिइ धाःसा मेलाया निंतिं आवश्यक तयारी शुरु जुइधुंकूगु दु ।
काभे्रया ऐतिहासिक, धार्मिक, सांस्कृतक व पुरातात्विक महत्वया पन्तिइ करिब न्याला लिपा मकर मेला जू वनाच्वंगु दु । १२ दँय् छक्वः जुइगु मेलाया तयारी यायेकथं मेलाया निंतिं आवश्यक पूर्वाधार तयार यायेगु नापनापं मेलाया प्रवद्र्धन यायेगु ल्याखं ज्याझ्वःत नं जुया वयाच्वंगु दु ।
खतुं मेलाया तयारी धाःसा दछि न्ह्यः हे न्ह्याःगु खः । थनिं दछि न्ह्यः पन्ति नगरपालिकां मेलाया आवश्यक तयारी यायेकथं थनया नांजाःगु त्रिवेणीघाट लगायतया थासय् आवश्यक भौतिक पूर्वाधारया ज्या न्ह्याकूगु खः । थ्व दथुइ आः वयाः अन्तर्राष्ट्रिय सामाजिक संस्था रोटरी क्बल अफ पन्तिं न्ह्यःने वयाच्वंगु मेलाया प्रवद्र्धन यायेकथंया ज्या न्ह्याकूगु दु । मकर संक्रान्ति अर्थात माघ लछियंकं न्ह्याइगु मेलाया प्रवद्र्धन यायेकथं रोटरी क्लबं मेलाया किपा अंकित थीथी ज्वलंत सार्वजनिक याःगु दु ।
नगरपालिकां मेलाय् विशेष आकर्षणया केन्द्रविन्दु त्रिवेणीघाटय् भौतिक संरचनालिसें मेला व्यवस्थित यायेत थीथीकथंया ज्या न्ह्याका वयाच्वंगु दु । अथे हे मेलाय् वइपिंत सहज जुइमा धइगु ल्याखं मेलास्थलतक वनेगु थीथी लँपु व सतक निर्माण व स्तरोन्नति यायेगु ज्या नं जुयाच्वंगु दु ।
व्यवस्थित रुपं मेला संचालन यायेत थीथी समिति तकं गठन यायेधुंकूगु दु । नगरपालिकां बिउगु जानकारीकथं मेलाया निंतिं छगू दर्जनं मल्याक थीथी समिति गठन जुइधुंकूगु दु । मेलाया मूल व्यवस्थापन समितिं थुगुसी त्रिवेणीघाट जक मखसे मुक्कं पन्ति देय्यात हे झः झः धायेक समाः यायेगु कथं ज्या न्ह्याकाच्वंगु सीदुगु दु ।
नगरपालिकां मेलायात हे ध्यानय् तयाः सतक, अस्थायी ताँ, भक्तजनतय् सुविधाया निंतिं विश्रामस्थल निर्माण लगायत भौतिक पूर्वाधार निर्माणया निंतिं थगुने ३ गू करोड तका बजेट विनियोजन याःगु खः ।
LEAVE YOUR COMMENTS