हाइकु ख्यःया १२ क्वःगु हाइकु वाचन

यल- नेवाः हाइकु ख्यःया ग्वसालय् झिंनिगूगु संस्करणया हाइकु वाचन ज्याझ्वः वंगु शनिवाः जुल । हाइकु ख्यलं नेपालभाषा हाइकु विधायात च्वन्ह्याकेगु तातुनाः भर्चुअल माध्यमं उकथंया ज्याझ्वःयात निरन्तरता बिया वयाच्वंगु खः ।

थुगु संस्करणय् मुक्कं मिसा हाइजिनपिंसं थःथःगु हाइकु वाचन यानादीगु खः । ज्याझ्वलय् सुनिता राजभण्डारी जुनु, ज्ञानदेवी शाक्य मिनर्भा शर्मा राजोपाध्याय व पौभा डंगोलं हाइकु वाचन यानादीगु खः । निगू चरणय् न्ह्याःगु ज्याझ्वलय् प्यम्हेसिनं म्हतिं झिपु झिपु हाइकु वाचन यानादीगु खः । ज्याझ्वलय् वाचन जूग हाइकुयात कयाः साहित्यकारलिसें समालोचक डा. पुष्पराज राजकर्णिकारं समीक्षात्मक टिप्पणी यानादीगु खः ।

अमेरिकाया शिकागोय् च्वनादीम्ह बाखं च्वमि केशरमान ताम्राकारं नुगः खँ तयादीगु ज्याझ्वलय् सुरेश प्रधानं लसकुस यानादीगु खःसा पूर्णिमा शाक्यं सुभाय् देछानादीगु खः ।