बुंगद्यःया रथ दयेकीपिनि १४४ रोपनी सरकारपाखें हडप

बुंग – पुर्खौंनिसें करुणामय बुंगद्यःया रथ दयेकाः छुं जग्गा जमीन जोते यानाः नयाच्वंपिं झिंनिगू परिवारया म्हतिं झिंनिपी जग्गा आः वयाः सरकारं हडप याःगु दु । पुतुवार धाइपिं नेवाः जाति दुनेया बोसि खान्की गुथि अन्तर्गत लानाच्वंगु थ्व १४४ रोपनी जग्गा गुथि संस्थानं उमित थी तकं मबिसे हडपे यानाः नःगु द्वपं सम्बद्ध पीडिततय्सं बिउगु दु ।

दँय्दसं करुणामयया रथ दयेकूगु बापत थनया फसिडोल लागाय् च्वंपिं थ्व झिंनिगू परिवारयात भिंmनिनी हे ल्याखं मुक्कं १४४ रोपनी जग्गा दान स्वरुप बियातःगु खः । गुथि संस्थानया नामय् वंगु थ्व जग्गाया बाली नयाः हे उमिसं रथ दयेकेगु व नियमित कर्म चले याना वयाच्वंगु खः ।

फाष्ट ट्राय्क, बागमति करिडोर, हाइटेन्शन व स्मार्ट सिटीया लोभ क्यनाः थ्व बुँ सरकारं धाःगु खँ धाःगु दु । बुंगद्यः जात्राया झ्वलय् रथ दयेकेगु महत्वपूर्ण ज्या याना वयाच्वंपिं थ्व पुतुवार जाति दुनेया बोसि खान्की गुथिया जग्गाय् २०७२ साल लिपा बुंगय् थःपिनि छेँ दुनेवं थुपिं थ्वहे जग्गाय् जस्ताया टहरा दयेकाः च्वं वंगु खःसा अझं अन हे च्वनाच्वंगु दनि । आः नं उपिं छम्हेसिया हे मेगु छेँ मदुनि । आः उगु जग्गा नं सरकारं हडप यानाः काल धाःसा छक्वलं हे थ्व गुथि खान्की गुथियारत फुक्कं सुकुम्बासी जुइ मालीगु अवस्था दु । हाल महर्जन हे थर च्वइपिं थ्व पुतुवार जातिया बोसि खान्की गुथियारतय्सं ताः इलंनिसें हे थुकिया बारे सः तया वःगु खःसां उमिगु सुनुवाई धाःसा जूगु मदु ।

थ्व पुतुवार जातिया बोसि खान्की गुथि परिवारयात निदँ प्यदँ न्ह्यवंनिसें ज्या हे मयाकुसे आः गुथि संस्थानं ठेक्कां रथ दयेकेगु ज्या यानाच्वंगु दु । पुर्खांनिसें नियमित रथ दयेकाच्वंपिंत लिकयाः आः ठेक्कां रथ दयेकेगु याना हयेवं उपिं थःपिंसं बसोबास याना वयाच्वंगु जग्गा जमीनपाखें नं बञ्चित जुइगु अवस्था पिहां वःगु खँ धाःगु दु । आः फसिडोल लागाय् २५ गू परिवार थ्वहे कारणं बिचल्लीइ यानाच्वंगु दु ।

छेँ व बुँ मदुगु कारणं थःपिं आः न्हूपिं दास सरह मेपिनिगु ज्या यानाः नयेमाःपिं हरूवा चरुवा थें हे जूवंगु खँ गुथियारतय्सं धाःगु दु । वडा समिति व नगरपालिका नापं गुथि संस्थानय् थःपिनि खँ तयेधुंकाः प्रति परिवार छगू रोपनी तक जग्गा बीगु निर्णय जुलं नं उगु जग्गा न्यायेमाःगु अवस्था वःगु पीडिततय्सं धाःगु दु ।

सर्वसाधारण व थीथी गुथिया नामय् लानाच्वंगु जग्गा गुथि संस्थान लगायत सरकारी निकायतय्सं अधिग्रहण यानाः काइगु व लिपा अज्याःगु जग्गा भूमाफियातय्सं हानं निजी यानाः नयेगु क्रम अप्वयाच्वंगु दु ।

सम्बन्धित बुखँ

LEAVE YOUR COMMENTS