अमेरिकां इराकंं सेना लित यंकीगु

एजेन्सी- अमेरिकां इराकय् दुपिं थः सेना लित यंकीगु जूगु दु । अमेरिकाया राष्ट्रपति जो बाइडेनं थुगु दँया अन्त तकया दुने इराकय् दुपिं अमेरिकी सेना लिहां वइगु घोषणा याःगु खः । इराकं लडाकू सेना लिहां वःसां इराकी सेनायात तालिम व सल्लाह बिइपिं सैनिकत धाःसा इराकय् हे च्वनीगु जुइ ।

अमेरिकाया भ्रमणय् दुम्ह इराकया प्रधानमन्त्री मुस्तफा अल काधिमी व अमेरिकाया राष्ट्रपति जो बाइडेनया दथुइ जूगु वार्ता लिपा थ्व घोषणा जूगु खः । राष्ट्रपति जो बाइडेनं वार्ता लिपा थःपि न्हूगु चरणय् दुहां वंसां आतंकवादविरुद्ध सहकार्य जुयाच्वनीगु धाःगु खः । इराकया प्रधानमन्त्री मुस्तफां आः इराकय् विदेशी सेना आवश्यक मदु धाःगु खः ।
थगुने अमेरिकां इराकया राजधानी बग्दादय् ड्रोन हमला यानाः इराकया जनरल कासिम सुलेमानीयात व इरानया समर्थन दुगु शिया मुस्मां मिलिसिया पुचःया नेतायात स्याना बिइवं इरान समर्थित पार्टीया नेतातय्सं अमेरिकी सेना लिहां वनेमाःगु माग तयावयाच्वंगु खः ।

चरमपन्थी संगठन इस्लामिक स्टेटलिसे ल्वायेत अमेरिकी सेना इराकय् च्वनाच्वंगु खः । इराकय् थ्यमथ्यं २५ सय अमेरिकी सैनिक दु । अमेरिकां अफगानिस्तानं नं थःपिनि सेना लित यंकेगु ज्या यानाच्वंगु दु ।