ने. सं. ११४४ कछलागा सप्तमी -

माडर्नाया खोपं न्हूगु भाइरसविरुद्ध नं ज्या याइगु दावी

एजेन्सी – अमेरिकी वासः कम्पनी मोर्डनां दयेकूगु कोरोना भाइरसविरुद्धया खोप थौंकन्हय् तसकं न्यना वनाच्वंगु कोरोनाया न्हूगु प्रजातिया भाइरसविरुद्ध ल्वायेत नं सक्षम ज ूगु खँ धाःगु दु । मोर्डनाया वैज्ञानिकतय्सं थःपिंसं उत्पादन यानागु खोपं न्हूगु प्रजातिया भाइसरविरुद्ध नं ल्वायेफुगु दावी याःगु खः ।

कम्पनीं थःगु प्रयोगशालाय् यानाच्वंगु प्रारम्भिक परीक्ष्ँणय् थज्याःगु न्हूगु ताजिया भाइरसयात नं थ्व खोपं म्हसिइकेफुगु व थ्वलिसे ल्वायेगु निंतिं प्रतिरोधी तत्व दयेकेत सक्षम जूगु खँ धाःगु दु। थुकिया बारे थप अध्ययन थ्व खोप कायेधुंकूपिं मनूतय् परीक्षण मार्फत जक यायेफइगु खँ नं कम्पनीं धाःगु दु। दक्षिण अफ्रिकाय् खनेदुगु कोरोना भाइरसया न्हूगु ताजि बेलायतय् खनेदुगु भाइरस स्वयां भचा घातक जूगु प्रारम्भिक अध्ययनं सीदुगु दु। थ्व न्हूगु ताजिया भाइरस नं संसारया तःगू देशय् न्यना वनेधुंकूगु दु ।

सेप्टेम्बरय् बेलायतय् खनेदुगु न्हूगु भाइरस पुलांगु भाइरस स्वयां ७० प्रतिशत तक याकनं संक्रमण जुइफुगु खनेदुगु खः । तर विश्वया थीथी कम्पनीं विकास याःगु खोप धाःसा पुलांगु भाइरसयात स्वयाः जक दयेकूगु जूगुलिं थुकिं न्हूगु भाइरसविरुद्ध ल्वायेफइ कि फइमखु धयागु जिज्ञासा जुयाच्वंगु खः । वैज्ञानिकतय्सं न्हूगु ताजिया भाइरसविरुद्ध नं थ्व खोपं ज्या बी धकाः धाःसां पुलांगु भाइरसविरुद्ध गुलि क्षमतां ज्या याइगु खँ न्हूगु भाइरसविरुद्ध नं उलि हे क्षमतां ज्या याइकि याइमखु धकाः धाःसा स्वये अझं ल्यं दनि ।

आः खनेदया वयाच्वंगु छुं छुं लिच्वःया आधारय् धाःसा फाइजरं दयेकूगु खोपं नं बेलायतं सुरु जूगु न्हूगु भाइरसविरुद्ध ल्वायेफुगु खनेदुगु दु। मोर्डनां नं थुकिया अध्ययनया निंतिं थःपिंसं विकास यानागु खोपया निगुलिं डोज कायेधुंकूपिं च्याम्ह मनूतय् हिया नमूना जाँच यानाः परीक्षण याना स्वंगु दु। थुपिं कम्पनीतय् निष्कर्ष कथं थःपिंसं दयेकूगु खोप न्हूगु ताजिया भाइरस प्रतिरोधी खनेदुगु खःसां वैज्ञानिकतय् दथुइ थुकिया समीक्षा जुइ ल्यंदनि धाःगु दु ।