सिंहं मालिकया ज्यान काल

सिंह हिंस्रक प्राणी खः । अले थ्वं थःगु न्ह्यःने वःपिं शिकारयात त्वःतीमखु । अथे खःसां मचांनिसें लहिनाः तालिम बियातःम्ह सिंहं धाःसा काचाक्क ज्यान काइमखु, थ्व मनूया पासा थें जुइ धइगु विचाः खःसा थ्व गलत खः । छाय्कि थथे हे थम्हं छेँय् लहिनातःम्ह छम्ह सिंह वया हे मालिकयात स्याना बिउगु दु ।

घटना चेक गणतन्त्रया खः । थनच्वंम्ह ३३ दँ दुम्ह माइकल प्रोसेस नांया मनूयात थम्हं लहिनातःम्ह सिंहं शिकार याना बिउगु दु । व नं छम्ह सिंह मखु माइकलं लहिनातःपिं निम्हं सिंहं । चेक गणतन्त्रया कानुनकथं हिंस्रक जंगली जनावरयात छेँय् लहीगु अनुमति मदु, तर माइकल प्रशासनलिसे ल्वानाः थःगु हे छेँय् निम्ह सिंह लहिउगु खः ।

शायद माइकल गबलें नं विचाः याःगु खइमखु कि थम्हं लहिना तयापिं सिंहं हे वयागु ज्यान काइ धकाः । माइकलया सीम्ह व हे सिंहयात लहिनातःगु पंजः दुनें हे प्रहरीं बरामद याःगु खः । सन् २०१६ निसें माइकलं थःगु छेँया लिउनेसं पंजः दयेकाः सिंहयात अन हे तयाः लहिनातःगु खः । व हे इलय् गुदँ दुम्ह सिंहयात प्रजननया निंतिं धकाः माइकलं मेम्ह छम्ह मिसाम्ह सिंह नं छेँय् लहीत हल ।

वयां लिपा वया जःलाखःलां नं माइकलया थ्व ज्यायात कयाः तच्वकं विरोध याना वयाच्वंगु खः, छाय्कि सिंह व सिंहनीं मानवीय क्षति यायेफुगु ग्याःचिकु इमिके दुगु खः । खतुं प्रशासनं नं सिंह लहीत अनुमति मबियाच्वंगु खः । तर, थ्व सकतां खँयात वास्ता मयासे माइकलं जिडिशोफ धइगु गामय् च्वंगु थःगु छेँय् सिंह लहिना वयाच्वंगु खः ।

अनुमति मदयेक हे सिंह लहिना वयाच्वंम्ह माइकल उकिया अनुमति कायेगु निंतिं प्रशासनय् गाक्कं कुतः नं याना वयाच्वंगु खः । तर प्रशासनं धाःसा माइकलया अनुमतियात अस्वीकार याना वयाच्वंगु खः । थन तक कि माइकलं अवैध प्रजनन यायेत स्वःगु द्वपनय् वयात जरिवाना तकं पुइकूु खः ।

तर माइकल लहिनातःपिं सिंहयात मेगु थासय् तयेगु वैकल्पिक व्यवस्था मदुगु व माइकलं नं इमित अनावश्यक रुपं दुःख बिउगु प्रमाण मदुगु व इमित च्वनेगु थाय् नं व्यवस्थित हे जुयाच्वंगु खनेवं प्रशासनं माइकलया छेँय् नं सिंहयात विस्थापित यायेगु कुतः याये मफु ।

तर आकाझाकां माइकलयात सिंहं स्याःगु घटनाया जानकारी वयेवं घटनास्थलय् थ्यंगु प्रहरीं सिंह व सिंहनी निम्हेसितं गोलीं कयेकाः स्याना बिउगु खः । थथे सिंह व सिंहनीयात स्यायेमाःगु कारण माइकलया सीम्ह लिकायेत खः, छाय्कि वयागु सीम्ह पंजलय् दुने लानाच्वंगु खःसा उकियात लिकायेगु निंतिं नं इमित स्यायेमाःगु खः ।