सुडानय् अपदस्थ प्रधानमन्त्रीयात त्वःतल

एजेन्सी- सुडानय् ‘सैन्य कू’ यानाः सेनां नजरबन्दय् तयातःम्ह सुडानया प्रधानमन्त्री अब्दल्लाह हमदोकयात त्वःतूगु दु । अन्तर्राष्ट्रिय सञ्चार माध्यमया कथं प्रधानमन्त्री हमदोक व हमदोकया कलाःयात सेनां मंगलवाः बहनी लिबाक त्वःतूगु खःसा हमदोक कडा सुरक्षाया दथुइ थःगु छेँय् लिहां वःगु दु । अन्तर्राष्ट्रिय दबाब लिपा सेनां प्रधानमन्त्री हमदोकयात त्वःतूगु खः । सेनां नजरबन्दय् तयातःपिं मन्त्री व वरिष्ठ अधिकारीतय्त धाःसा त्वःतूगु मदुनि । सेनां कूया विरोध याःपिं प्रदर्शनकारीतय्त नं त्वःतूगु मदुनि ।

प्रधानमन्त्री हमदोकयात त्वःते न्ह्यः सुडानया सेना प्रमुख जनरल अब्देल फतह अल बुरहानं थःगु छेँय् तयातयागु धाःगु खः । सत्ता ल्हातय् कायेधुंकाः याःगु पत्रकार सम्मलेनय् सेना प्रमुखं प्रधानमन्त्रीयात खतरा दुगुलिं थःगु छेँय् यंकागु धाःगु खः । सेना प्रमुख अल बुरहानं देश गृहयुद्धपाखे वनेत्यंगुलिं सेनां थ्व पलाः ल्ह्वने माःगु धाःगु खः ।

सुडानय् सोमवाः निसें सेनां याःगु ‘कू’या विरुद्ध प्रदर्शन जुयाच्वंगु दु । सेनां ‘कू’या विरुद्ध प्रदर्शन यानाच्वंपित गोलीं कयेकूगु खःसा गोलीं लानाः न्हय्म्ह मनू सीगु खः । सुडानय् सेना विरुद्ध प्रदर्शन दिउगु मदुनि ।