पाकिस्तानय् विपक्षीपाखें चुनाव लिच्वः अस्वीकार

नकतिनि क्वचाःगु पाकिस्तानया आम चुनावया लिच्वःयात पराजित पार्टीतय्सं अस्वीकार यायेगु खँ धाःगु दु । आम चुनावय् पुलांम्ह क्रिकेट कासामि इमरान खानया पार्टी तहरिक ए पाकिस्तान त्याःगु खः । थ्व विजय लिसें खान पाकिस्तानया प्रधानमन्त्री जुइत्यंगु इलय् पराजित पार्टीतय्सं चुनावया लिच्वः स्वीकार यायेफइमखु धाःगु खः ।

चुनावय् धाँधली जूगु धासें पराजित जूगु पार्टीतय् मंकाः सहलह लिपा उमिसं पुनःनिर्वाचनया माग याःगु दु । पूलांगु सत्तारुढ दल पिएमएल–एनं नं आन्दोलनय् कुहां वयेगु खँ धाःगु दु । पिएमएल एनं थ्वयां न्ह्यः चुनावया लिच्वः वयेधुंकाः थःपिं प्रतिपक्षय् च्वनेत तयार दु धाःगु खः । भ्रष्टाचारया द्वपनय् जेलय् लानाच्वंम्ह पुलांम्ह प्रधानमन्त्री नवाज सरिफया किजा शहबाज शरिफं संसद बहिष्कार यायेगु कि मयायेगु धयागु बारे निर्णय याये ल्यं दनिगु खँ धयादीगु दु ।

पत्रकार सम्मेलनय् शरिफ लिसें च्वनाच्वंम्ह एमएमए पार्टीया नेता व प्रवक्ता मौलाना फजालुर रहमानं हाकनं चुनाव याकेगु निंतिं थःपिं आन्दोलनय् कुहां वनेगु खँ धयादीगु दु । छगू दर्जनं मल्याक पार्टीया नेतातय् बैठकं चुनाव लिपा गुकथं न्ह्याः वनेगु धयागु रणनीति दयेकूगु खः ।

उगु बैठकय् पुलांम्ह प्रधानमन्त्री बेनजिर भुट्टोया पाकिस्तान पिपुल्स पार्टीं धाःसा ब्वति मकाः । भुट्टोया हत्या लिपा थौंकन्हय् पिपिपी पार्टी वय्कःया काय बिलावल भुट्टों न्ह्याकाच्वंगु दु । पिपिपी पार्टी आःया चुनावय् स्वंगूगु थासय् लानाच्वंगु दु ।