परीक्षण बुलुहुँ जक या : ट्रम्प

एजेन्सी – अमेरिकी राष्ट्रपति डोनाल्ड ट्रम्पं कोरोना भाइरसया परीक्षण यानाच्वंपिं स्वास्थ्यकर्मी व ल्याब टेक्निसियनतय्त परीक्षण बुलुहुं यायेत इनाप यानादीगु दु । ‘गुलि परीक्षण यात, उलि हे संक्रमितत अप्वः खनेदइ’ धासें वय्कलं परीक्षण ज्या हथासं मयायेत धयादीगु दु ।

ओक्लाहोमया तुल्साय् कोरोना भाइरसया महामारीया दथुइ थःगु राष्ट्रपतिय चुनाव अभियान सुरु यानादिसें राष्ट्रपति ट्रम्पं धयादीगु दु, ‘स्वयादिसँ थ्व खँ सकसिनं सिउगु हे खःकि थ्व चीनं न्यना वःगु खः, तर जिं थ्व निर्णय यानागु दु कि थुकियात कयाः छुं तःधंगु निर्णय यायेमाःगु आवश्यक मदु ।’

राष्ट्रपतीय निर्वाचनया अभियानया निंतिं स्टेजय् थहां वनाः सम्बोधन यानादीम्ह ट्रम्पं थ्व ज्याझ्लय् कोरोना संक्रमणं सुरक्षित जुइत धकाः म्हुतुइ मास्क तकं तयामदी । थ्व अभियानय् सहभागी जूपिं द्वलंद्वः समर्थकतय्सं नं थः नेताया भावनाया कदर यासें मास्क व पञ्जा मछ्यसे च्वंगु खः ।

ट्रम्पं धाःगु दु, ‘जब तःधंगु ल्याखय् परीक्षण जुइ, यक्व नागरिकत संक्रमित जूगु लुइ, उकिं जिं अमेरिकी अधिकारीतय्त धया वयाच्वनागु दु कि झीसं परीक्षण ला यानाच्वनागु दु, तर नागरिकतय्सं धाथें छु जुयाच्वन धयागु हे मसिउ ।’

ट्रम्पया कथं अमेरिकाय् यक्व मनूतय् (निगू करोड ५० लाख स्वयां अप्वः) कोरोना परीक्षण जूगुलिं संक्रमिततय् ल्याः नं अप्वः खनेदुगु खः । थःगु चुनावी अभियानय् वय्कलं आः स्कूल नं चायेकेमाःगु तर्क तसें धयादीगु दु, ‘मस्त झी स्वयां झन बल्लाः ।’

मेखे अमेरिकाया हे जोन हप्किन्स विश्वविद्यालयया लिपांगु तथ्यांक कथं अमेरिकाय् जक आइतवाः तकया दुने २२ लाख ५४ हजार ६६२ म्हेसिके संक्रमित जूगु पुष्टि जूगु दुसा थन १ लाख १९ हजार ७१९ म्ह मनूतय् ज्यान वनेधुंकूगु दु ।

सम्बन्धित बुखँ

LEAVE YOUR COMMENTS