गल्ती स्वीकार याःसा ठाकुर पक्षयात नं दुकाइगु

येँ – ताः इलंनिसें विवादय् लानाच्वंगु जनता समाजवादी पार्टी (जसपा) अन्ततः पार्टी नेता उपेन्द्र यादवया पक्षय् वंगु दु । निर्वाचन आयोगं निगुलिं पार्टीया केन्द्रीय दुजःतय्गु छ्यंग्वः ल्याः यानाः बहुमतया आधारय् आधिकारिक जसपा उपेन्द्र यादवया पक्षय् दुगु फैसला न्यंकूगु खः । पार्टीया आधिकारिताया यादवया पक्षय् दु लाकि महन्थ ठाकुरया पक्षय् दु धयागु खँय् विवाद दुगु खः ।

साेमवाः निर्वाचन आयोगया न्याम्ह दुजः दुगु इजलासं यादव पक्षयात आधिकारिकताया मान्यता बिउगु खः ।

निर्वाचन आयोगया प्रवक्ता राज कुमार श्रेष्ठया कथं महन्थ ठाकुर पक्षयात धाःसा न्हूगु दल दर्ता यायेगु ह्वःताः बिउगु दु । प्रवक्ता श्रेष्ठं धयादिल, ‘आयोगया इजलासं उपेन्द्र यादव पक्षयात बहुमतया आधारय् आधिकारिकता बीगु निर्णय याःगु दु, मेगु पक्षयात दल दर्ताया ह्वःताः बीगु निर्णय जूगु दु ।’

सर्वोच्च अदालतं वंगु आइतवाः जसपाया अध्यक्ष महन्थ ठाकुर पक्षया माग कथं निर्वाचन आयोगं छ्यंग्वः ल्याः खायेगु धकाः दयेकूगु कार्यक्रम दिकेत अन्तरिम आदेश मबीवं आयोगया निर्धारित ज्याझ्वः न्ह्याःगु खः । गुकी छ्यंग्वः ल्याः खानाः यादव पक्षयात आधिकारिक मान्यता बिउगु खः ।

५१ म्ह दुजः दुुगु जसपाया केन्द्रीय कार्यकारिणी समितिइ यादवया पक्षय् ३४ म्ह दुजः उपस्थित जुयाः सनाखत याःगु खः । उकथं हे महन्थ ठाकुरया पक्षय् १६ म्ह दुजःपिंसं समर्थन याःगु खः । निलम्बित सांसद रेशम चौधरी धाःसा तटस्थ च्वनादीगु खः ।

निर्वाचन आयोगं पार्टीया आधिकारिक मान्यता यादवयात बिउसां नं यदि ठाकुर पक्ष थःगु गल्ती स्वीकार यानाः दुहां वल धाःसा उमित लसकुस याइगु खँ जसपा संघीय परिषदया अध्यक्ष डा. बाबुराम भट्टराईया स्वकीय सचिव रोशन पोखरेलं कनादीगु दु । आः छुं ई लिपा च्वनीगु पार्टीया बैठकं अज्याःगु निर्णय यायेफइगु खँ वय्कलं कनादीगु दु ।

आत्मालोचना यानाः वःसा लसकुस दु – यादव
पार्टीया आधिकारिता बारे निर्वाचन आयोगया फैसला वयेधुंकाः पत्रकारत लिसे खँ ल्हासें अध्यक्ष उपेन्द्र यादवं थ्व फैसला लिपा छुं मनूत पार्टी त्वःताः पिहां वने फइगु सम्भावना दु तर नं पार्टी धाःसा तज्याइ मखु धयादिल । वय्कलं पार्टी दुने च्वनाः ज्या यायेत सुनां नं पंगु मदु धासें धयादिल, ‘थुकियात फुट धाये मिले मजू । जिमिसं पार्टीया लुखाय् तालं ग्वयातयागु मदु, आः फुक्कं सांसद जसपाया हे पक्षय् दु ।’ वय्कलं आत्मालोचना यानाः वःसा ठाकुर पक्षयात नं थाय् दइ धयादिल ।

पार्टी तज्याःसां जनता जिमिगु पक्षय्- महतो
ठाकुर पक्षया नेता राजेन्द्र महतों न्हापा यादवयात मछिंगु अवस्थाय् तत्कालीन राजपां एकता प्रस्तावयात स्वीकार यासें साथ बियागु खःसां आः थःपिंत हे पार्टी विहिन याःगु द्वपं बियादीगु दु । वय्कलं निर्वाचन आयोगयात पार्टी तछ्यायेगु ज्या याःगु द्वपं नं बियादीगु दु । पत्रकारतलिसे खँ ल्हासें वय्कलं धयादिल, ‘जिपिं पार्टी तछ्यायेगु निंतिं आयोगय् वनागु मखु । तर आयोगं पार्टी तछ्यायेवं पार्टी तज्याइ मखु, जनतापाखें पार्टी निर्माण जुइगु खः, जनता जिमिगु पक्षय् दु ।’

आः ठाकुर पक्षया सांसद पद छु जुइ ?
जसपाया आधिकारिकता उपेन्द्र यादवया पक्षय् वनेवं आः महन्थ ठाकुरया पक्षय् वंपिं सांसदतय्गु पद छु जुइ धइगु न्ह्यसः पिहां वःगु दु । जसपा धइगु पार्टीया आधिकारिता यादवया पक्षय् वंगु जुयाः आः ठाकुरया पक्षय् वनीपिं सांसदतय्गु पद खारेज जुइफुगु खँ धाःगु दु ।

जसपा यादव पक्षया नेता राजेन्द्र श्रेष्ठं कनादीकथं आः ठाकुर पक्षया सांसदतय्गु पद ‘धराप’ य् लाःगु दु । वय्कलं कनादी कथं छुं जुयाः ठाकुर पक्षं मेगु पार्टी दर्ता यात व थ्व सांसदत उगु पार्टीइ वन धाःसा वय्कःपिनिगु पद खारेज जुइ ।

ठाकुरया पार्टीइ वंपिं सांसदत आवंलि थःगु पार्टीया दुजः मखुत धकाः उमिगु विरोधय् उपेन्द्र यादवं पौ च्वयाः सभामुखयात बिल धाःसा सभामुखं उपिं पदमुक्त जूगु जानकारी बी । एमालेय् वंपिं माओवादी सांसद टोपबहादुर रायमाझीया पद गथे वंगु खः आः ठाकुर पक्षया सांसदतय्गु पद नं वनीगु सम्भावना दु ।

नेता श्रेष्ठं कनादीकथं यदि ठाकुर पक्षं संविधान बमोजिम संसदीय दलया ४० प्रतिशत सांसदत यंके फत धाःसा उमिसं अलग्ग पार्टी खडा याये फइ नापं सांसदतय्गु पद नं बचे याये फइ । तर आःसा समीकरण स्वयेबलय् अथे जुइ फइगु सम्भावना मदु ।

जसपाया कुल सांसद मध्ये यादवया पक्षय् २१ म्ह सांसद दुसा ठाकुरया पक्षय् ११ म्ह जक सांसद दु । थुलि सांसदया भरय् पार्टी तछ्याये फइ मखु । छुं जुयाः पार्टी त्वःता वन धाःसा नेता महन्थ ठाकुर, राजेन्द्र महतो, अनिल यादव थेंज्याःपिं वरिष्ठ नेतातय्गु हे सांसद पद गुमे जुइगु खतरा दु ।