ने. सं. ११४६ अनलाथ्व नवमी -

बुंगद्यः रथय् बिज्याकल, जात्रा क्वमजिउनि (किपा स्वयादिसँ)

यल (नेपालभाषा टाइम्स) – करुणामय बुंगःद्यःयात थौं रथय् बिज्याकल । थौं न्हिनय् १ बजे पाखें यलया तबहालय् च्वंगु सतलय् बिज्याकातःम्ह बुंगःद्यःयात अनं थनाः पुल्चोकय् दयेकातःगु रथय् बिज्याकूगु खः ।

ताःईया सहलह, विवाद लिपा बुंगःद्यःयात थौं रथय् बिज्याकेफुगु खः । कोरोना भाइरसया संक्रमणया ग्याःचिकुया कारणं सरकारं लकडाउन तःगुलिं बुंगःद्यःया जात्रा नियमित कथं जुइमफयाच्वंगु खः । थ्व हे कारणं वंगु वैशाख १२ गते हे रथय् बिज्याकेमाःम्ह बुंगःद्यःयात रथय् बिज्याके मफुगुलिं देगलं पित हयाः सतलय् जक तयेगु ज्या याःगु खः ।

थ्व लिपा बुंगःद्यःया जात्रा यायेगु कि मयायेगु धयागु खँय् ताःई निसें सहलह जुया वयाच्वंगु खः । थ्वयां न्ह्यव नं निक्वः तक बुंगःद्यःयात रथय् बिज्याकेगु साइत बीधुंकूगु खःसां सरकारी प्रशासनं याके मबिउगुलिं दिकूगु खः । थौं नं बुंगःद्यः रथय् बिज्याकेगु साइत बियातःगु खःसां गुथि संस्थान यल शाखां बुधवाः आकाझाकां जात्रा दिकेगु परिपत्र जारी जूगु खःसा बिहिवाः, शुक्रवाः जात्राया सरोकारवालात वनाः यल जिल्ला प्रशासन कार्यालयय् हे वनाः सहलह यायेधुंकाः थौं रथय् तयेगु क्वःजिउगु खः ।

द्यः रथय् बिज्याकूसां जात्रा धाःसा अझं क्वःजिउगु मदुनि । वइगु भदौ १ गते जात्रा यायेगु धयातःसां उबलय् जात्रा जुइगु खः मखु अझं धायेफुगु अवस्था मदुनि । ज्यापु समाजया नायः चन्द्र महर्जनं द्यः सालेगु तिथि क्वःछित हाकनं बैठक च्वनेत्यनागु खँ धयादीगु दु । वय्कलं वइगु शनिवाः जक मेगु बैठक च्वनाः जात्राया तिथि क्वःछिइगु खँ धयादीगु दु ।

चाकुबाद्यःयात धाःसा प्यन्हु लिपा जक रथय् बिज्याकीगु सीदुगु दु । न्हापांनिसें बुंगद्यः रथय् बिज्याकूगु प्यन्हु लिपा जक चाकुबहाः द्यःयात रथय् बिज्याकेगु चलन दया वयाच्वंगु खः । थ्व हे कथं आः प्यन्हुलिपा जक चाकुबहाद्यःयात रथय् बिज्याकी । चाकुबहाःद्यःया रथ नं दयेका तयेधुंकूगु दु ।