ने. सं. ११४४ कौलाथ्व पारू - नःलास्वनेगु

ताम्रकार समाजया धाःबाजं प्रशिक्षण क्वचाल

यल – ताम्रकार समाज, यलया ग्वसालय् जूगु निलायंकंया परम्परागत धाःबाजं प्रशिक्षण क्वचाःगु दु । समाज अन्तर्गतया युवा तथा खेलकुद उपसमितिया ग्वसालय् जूगु उगु प्रशिक्षण मूल रुपं थौंया न्हू पुस्तायात लक्षित यानाः ग्वसाः ग्वःगु खः ।

यल महानगरपालिका संस्कृति, सम्पदा व पुरातत्व संरक्षण केन्द्रया ग्वाहालिं जूगु तालिमया समापन ज्याझ्वलय् यल महानगरपालिका वडा नं. २४ या वडाअध्यक्ष नापं महानगरपालिकाया सामाजिक विकास समितिया संयोजक दिनेश कार्की मूपाहांकथं झायादीगु खःसा वडा नं. ४ या वडाअध्यक्ष नारायण केसी, वडा नं. १९ या वडाअध्यक्ष विनोद ताम्रकार, केन्द्रया अधिकृत सबिना महर्जन विशेष पाहांकथं झायादीगु खः ।

ज्याझ्वलय् मूपाहां कार्कीं सम्पदा, संस्कृतिया संरक्षणय् भाला ल्याय्म्हतय् हस्तान्तरण यायेगु समाजया ज्या च्वछायेबहजू धयादिल । थज्याःगु प्रशिक्षण ज्याझ्वलय् यल मनपाया म्हो जक बजेट जूसां पूर्ण रुपं सदुपयोग जूगु धाःसे सन्तुष्टि प्वंकादिल ।ज्याझ्वःया सभापतिलिसें समाजया नायः रवीन्द्रराज ताम्रकारं थज्याःगु प्रशिक्षणं आत्मविश्वास अप्वयेकीगु जक मखसे थःके सुलाच्वंगु प्रतिभायात नं न्ह्यब्वयेगु अवसर दइगु जूगुलिं थःपिं सन्तुष्ट जूगु धयादिल ।

धाःबाजं लगायत नेपाःया परम्परागत बाजं लोप जुया वनीगु अवस्थाय् थ्यनाच्वंगु इलय् ल्याय्म्हतय्त थुखेपाखे आकर्षित यायेगु ल्याखं प्रशिक्षणया ग्वसाः ग्वयागु खः धयादिसें यल मनपां ज्याझ्वः छनोट यायेबलय् संस्थाया क्षमता व स्तरय् नं ध्यान बीत इनाप यानादिल ।
उगु धाःबाजं प्रशिक्षणय् च्यादँ दुुम्ह निसें कयाः पीदँ तक दुपिं नीम्हेसिनं प्रशिक्षण काःगु खः ।

प्रशिक्षार्थीपाखें मनुज ताम्रकारं प्रशिक्षणय् सहभागि जुइखंगुलिं थः तसकं लय्ताःगु धासें निलाया दुने आधारभूत तालिम जक सयेके खंगु व आः नियमित रुपं सयेका वनेगु कुतः यायेगु प्रतिवद्धता प्वंकादिल । उगु प्रशिक्षण गुरुपिं राम ताम्रकार, सन ताम्रकार, बिजु राजकर्णिकार प्रशिक्षण बियादीगु खःसा समापन ज्याझ्वलय् प्रशिक्षक व तालिमय् सहभागितपिंत मूपाहांपाखें सुभाय् पौ नं लःल्हाःगु खः ।