पार्टीं मसीक जसपा नेतात वालुवाटारय्
येँ -जसपा नेतातय्सं प्रधानमन्त्री केपी ओलीयात नापलाःगु खँ वहे पार्टीया वरिष्ठ नेतातय्सं मसिउगु खँ धाःगु दु । म्हिगः जसपाया नेतात महन्थ ठाकुर, राजेन्द्र महतो, लक्ष्मणलाल कर्ण व सर्वेन्द्रनाथ शुक्लां प्रम ओलीयात नापलाःगु खः । वय्कःपिं सकलें पूर्व राजपापाखें वःपिं नेतात खः ।
वय्कःपिं म्हिगः वालुवाटार वंगु खँ जसपाया अध्यक्ष उपेन्द्र यादवं मसिउगु खँ धाःगु दु । ‘नेपालभाषा टाइम्स’ लिसे खँ ल्हासें अध्यक्ष यादवं पार्टीया सु नेतां प्रम नापलात खः उकिया जानकारी थःके मदु धयादिल । लिसें वय्कलं थ्व नापलायेगु ज्या पार्टीया आवश्यकता कथं जूगु मखु नं धयादिल ।
उकथं हे पुलांम्ह प्रधानमन्त्री डा. बाबुराम भट्टराईया स्वकीय सचिव रोशन पोखरेलं नं जसपा नेतातय्सं छु उद्देश्यं प्रम नापलाःगु खः उकिया जानकारी पार्टीया संघीय परिषद अध्यक्ष डा. भट्टराईयाके नं मदुगु खँ कनादिल ।
उकथं हे जसपाया कार्यकारिणी दुजः राजेन्द्रं श्रेष्ठं नं जसपा नेतातय्सं प्रम ओली नापलाःगु बारे थःके जानकारी मदुगु खँ कनादीगु दु ।
‘नेपालभाषा टाइम्स’ लिसे खँ ल्हासें नेता श्रेष्ठं धयादिल, ‘थ्व पार्टीया निर्णय मखु, उकिया जानकारी पार्टीयात मदु, अथे जुयाः छु कारणं पार्टीया नेतातय्सं प्रम नापलात धइगु खँ जिं नं मसिउ ।’
सर्वोच्च अदालतं संसद पुनस्र्थापना यायेधुंकाः जसपा दुनेया पूर्व राजपा पुचलं धुवांधू प्रधानमन्त्रीयात नापलानाच्वंगु दु । थुकिं यानाः जसपा दुने तनाव ब्वलंगु खँ सूत्रं धाःगु दु । प्रम ओलीं जसपाया नेतृत्वय् सरकार गठन याकेत थः तयार दु धकाः प्रस्ताव छ्वयाहःगु चर्चाया नापनापं वय्कःपिनि थ्व भेट ख्वातुया वःगु खः ।
थ्व स्वयां न्ह्यः प्रम ओलीं जसपा तछ्यायेगु निंतिं पार्टी विभाजन सम्बन्धी अध्यादेश हःगु खःसा तत्कालीन इलय् जसपाया सक्रियताय् उगु अध्यादेश लित कायेगु ज्या जूगु खः । उगु इलय् ओली पुचलं जसपाया छुं सांसदतय्त अपहरण यानाः येँया छगू होटलय् तयातःगु खःसा जसपाया कार्यकारिणी दुजः गंगानारायण श्रेष्ठ लिसें जसपा नेता आङकाजी शेर्पाया कुतलं होटलय् कुनातःपिं सांसदत मुक्त याःगु खः ।
थ्वहे झ्वलय् म्हिगःया वार्ताय् प्रम ओली जसपाया माग प्रति सकारात्मक जूगु खँ धाःगु दु । म्हिगः प्रम ओलीं संसदय् थःत समर्थन यायेत इनाप याःगु खँ जसपा नेतातय्सं धाःगु दु ।
जसपाया माग प्रति प्रम सकारात्मक जूगु खःसा प्रधानमन्त्रीं कुनातःम्ह रेशम चौधरी लिसें थः कार्यकर्तायात त्वःतेमाःगु व प्रक्रिया न्ह्याकेमाःगु माग यासें सरकारं प्रक्रिया न्ह्याकल धाःसा थःपिं सरकारयात समर्थन यायेत तयार दुगु लिसः बिउगु खः ।
LEAVE YOUR COMMENTS