मन्त्रिमण्डल पुनर्गठनया तयारी

बांलाक ज्या मयाःपिं मन्त्रीत फुक्कं लिकया छ्वइगु

येँ – प्रधानमन्त्री केपी शर्मा ओलीं मन्त्रिमण्डल पुनर्गठनया लागिं तयारी यानादीगु खँ सीदुगु दु । पार्टी अध्यक्ष पुष्पकमल दाहाल व ओली दथुइ मन्त्रिमण्डल पुनर्गठन बारे सहलह जुयाच्वंगु खँ सूत्रं धाःगु दु । वइगु चैत १४ व १५ गते येँय् लगानी सम्मेलन क्वचायेवं मन्त्रिमण्डल पुनर्गठन याना छ्वयेगु तयारी यानाच्वंगु खँ सूत्रं धाःगु दु ।

पार्टीया निम्ह अध्यक्षपिंसं छुं न्हि न्ह्यवंनिसें हे मन्त्रिमण्डल पुनर्गठनया तयारी यानाच्वंगु खःसां आकाझाकां संस्कृति, पर्यटन तथा नागरिक उड्डयन मन्त्री रविन्द्र अधिकारी हेलिकप्टर दुर्घटनाय् लानाः मदयेवं थ्व ज्यायात छुं ई लिछ्याःगु खः । सरकारं ग्वसाः ग्वया तःगु लगानी सम्मेलनया तयारी जुयाच्वंगुलिं थुकिया दथुइ मन्त्रिमण्डल पुनर्गठन मयाइगु खँ सूत्रं धाःगु दु ।

लगानी सम्मेलन न्ह्यःने वयाच्वंगु इलय् मन्त्रिमण्डल पुनर्गठन यात धाःसा उकिं अन्तर्राष्ट्रिय क्षेत्रय् बांलाःगु सन्देश वनी मखु धइगु बिचाः यानाः मन्त्रिमण्डल पुनर्गठन मयाःगु सूत्रया दावी दु । प्रधानमन्त्री ओलीं गुलिखे वर्तमान मन्त्रीतय्गु ज्या चित्त बुझे मजुयाः मन्त्रिमण्डल पुनर्गठन यायेगु बारे मेम्ह अध्यक्षलिसे सल्लाह कयाच्वंगु खँ धाःगु दु ।

मेम्ह अध्यक्ष दाहाल नं मन्त्रिमण्डल पुनर्गठनया निंतिं सकारात्मक जूगुलिं लगानी सम्मेलन लिपा मन्त्रिमण्डल पुनर्गठनया निश्चित जूगु खँ सूत्रं धाःगु दु ।मन्त्रिमण्डल पुनर्गठन लिपा आः मन्त्रिमण्डलय् दुथ्याःपिं मन्त्रीत गुलिं दोहोरे जुइफइगु सम्भावना दुगु खँ धाःगु दु । विशेष यानाः थौंकन्हय् थःगु मन्त्रालयय् बांलाक ज्या यानाच्वंपिं मन्त्रीत दोहोरे जुइफु ।