नेवाः दिवस हनेत तयारी मुँज्या

पन्ति (नेपालभाषा टाइम्स)÷ झिंप्यक्वःगु नेवाः एकता दिवस काभ्रे जिल्लाया नेवाः वस्ती पन्तिइ याइगु जूगु दु । नेवाःतय्सं नेवाःत एकता जूगु नापं नेवाः स्वायत्त राज्य घोषणा जूगु दिंयात लुमंकाः दँय्दसं थें थुगुसी पोहेलाथ्व नवमि (माघ ५ गते) शुक्रवाः थुगु दिवस हनेत्यंगु खः ।

वंगु शनिवाः पन्तिया थीथी खलः पुचःया प्रतिनिधिपिनि भेला यानाः थुगु दिवस हनेत माःगु तयारी न्ह्याकूगु दु । नेवाः देय् दबूया संयोजनय् थीथी राजनीतिक दललिसे आवद्ध थीथी नेवाः संगठन नापं नेवाःतय्गु जातीय संस्था व खलः पुचःयात दुथ्याकाः मंकाः कथं नेवाः एकता दिवस हनेगु यानाः वयाच्वंगु खः । थुगु दिवसयात नेवाःतय्सं तसकं महत्व बिया वयाच्वंगु दु ।

पन्तिइ शनिवाः जूगु तयारी मुँज्याय् नेवाः देय् दबू काभ्रे जिल्ला समिति, नेवाः देय् दबू पनौति नगर समिति, हलिं नेवाः गुथि काभ्रे जिल्ला समिति, हलिं नेवाः गुथि पनौति नगर समिति, नवलकचा नेवाल समाज, तःमुँज्या समिति, कार्यविनायक महिला समूह, महालक्ष्मी महिला समुह, पनौति नेपाल लागायापिं प्रतिनिधिपिं सहभागी दुगु खः ।

थगुने बलम्बुइ नेवाः एकता दिवस याःगु खःसा थुगुसी स्वनिगलं पिने नेवाः एकता दिवस जुइत्यंगु थ्व न्हापांखुसी खः । नेवाःतय्गु हक अधिकारया नितिं सः थ्वयेकेगु अले नेवाःतय्त छधी व छप्पँ जुइगु छगू माध्यमया रुपय् नं नेवाः एकता दिवस हना वयाच्वंगु खः ।

नेवाः एकता दिवसया लसताय् नेवाःतसें थःथःगु लागाय् नं थीथी कथंया ज्याझ्वः यानाः एकता क्यनेगु नापं नेवाः सः थ्वयेकेगु यानाच्वंगु दु । थुगुसी झिंप्यक्वःगु नेवाः एकता दिवस पन्तिइ यायेखनीगु जूगुलिं पन्ति नगरया स्थानीयत तसकं उत्साहित जुयाच्वंगु खँ तयारी मुँज्याय् थीथी खलः पुचःया प्रतिनिधिपिंसं
धयादीगु दु ।

सम्बन्धित बुखँ

LEAVE YOUR COMMENTS