
एजेन्सी- टर्कीया राजधानी इस्तानबुलया समुद्रय् छगू कथं चिकं कंगु ध्याचः खनेदुगु दु । राष्ट््पति रेजेप तय्यीप अर्दोआनं तटीय क्षेत्रयात लखय् खनेदुगु थज्याःगु चिल्लोकंगु ध्याचःपाखें बचे यायेगु खँ धयादीगु दु ।
चिकंकंगु थ्व ध्याचः यानाः इस्तानबुलया मर्मरा सागरय् न्यना वनाच्वंगुलिं अनया समुद्री जीवया लिसें न्या उद्योगयात नं लिचवः लाकाच्वंगु दु । विज्ञतय्सं प्रदूषण जलवायु परिवर्तनया कारणं थज्याःगु समस्या वयाच्वंगु खँ धाःगु दु । राष्ट्रपति एर्दोआनं झीगु समुद्रयात थज्याःगु ध्याचःपाखें बचे यायेगु आशा यानागु दु धयादीगु दु ।
समुद्रय् दइगु लेउलय् आवश्यक स्वयां अप्वः पोषणतत्व दइगु व उबलय् हे जल प्रदूषण व क्वाःगु मौसमया कारणं प्राकृतिक रुपं हे थज्याःगु वाउँसेच्वंगु ध्याचः वइगु खँ धाःगु दु । सन् २००७ य् न्हापांखुसी टर्कीया समुद्रय् खनेदुगु थज्याःगु ध्याचं लिपा ग्रीस लिक्क लाःगु एजियन सागरय् नं खनेदुगु खः ।
थ्व पालय् टर्कीया मर्मरा सागरया तःधंगु ब्वय् हे थज्याःगु ध्याचः खनेदयाच्वंगु । थ्व ब्वः कृष्ण सागर निसें एजियन सागरतक स्वाइगु खँ धाःगु दु । इतिहासय् आःतकया दकलय् तःधंक थुकथं ध्याचः खनेदुगुलिं स्थानीय समुदाय धाःसा ग्यानाच्वंगु दु ।
राष्ट्रपति एर्दोआनं प्रशोधन यानामतःगु फोहर समुद्रय् वांछ्वयेगु यानाच्वंगु व अप्वयाच्वंगु तापक्रमं यानाः थज्याःगु समस्या वःगु धासें थुकिया अनुसन्धान यायेत अधिकारीतय्त निर्देशन बियादीधुंकूगु दु ।
वय्कलं थ्व ध्याच कृष्ण सागरय् न्यना वन धाःसा समस्या तसकं तःधं जुइ धासें थुकियात पनेत तुरुन्त पलाः न्ह्याकेमाःगु खँ धयादीगु दु ।
थ्व ध्याचलं यानाः यक्व समुद्री जीव व ततःधिकःपिं न्या सिनाच्वंगु रिपोर्ट वःगु दु । अथेहे आः मर्मरा सागरय् डुंगा चले यायेबलय् नं थ्व ध्याचलं डुंगाया मोटरय् असल लाकेफुगुलिं छुं छुं थासय् डुंगा चले यायेत नं प्रतिबन्ध तयेधुंकूगु दु ।
LEAVE YOUR COMMENTS