छ्यंया मू ७६ लाख

थ्व संसारय् सम्भवतः लागू वासः तस्करीया निंतिं दकलय् अप्वः बदनाम देय् कोलम्बिया छगू हे जक खः । थन दँदँ न्ह्यवंनिसें लागू वासः तस्करी छगू प्रमुख समस्याया रुपय् दया वयाच्वंगु दु । स्वयम कोलम्बिया सरकारया निंतिं जक मखसे उकिया जःखः व मेमेगु देय्या निंतिं नं लागू वासः तस्करीया निंतिं कोलम्बिया कपाः स्याःगु विषय जुयाच्वंगु दु ।

कोलम्बियाय् लागू वासः तस्करी लगे जूपिं आपालं नायक व खलनायक जुयाः पिहां वःपिं नं दु । थ्व झ्वलय् लिपांगु इलय् कोलम्बियाय् छम्ह खिचा सेलिब्रिटी थें हे चर्चित जुयाच्वंगु दु । ‘सोम्ब्रा’ नांया उम्ह खिचा लागू वासःया तस्करीतय् निंतिं तसकं हे खतरनाक जुयाः वयाच्वंगु दु । अले लागू वासःया तस्करीतय् निंतिं सोम्ब्रा खलनायक स्वयां म्हो मजू ।

लागू वासः तस्करीतय्त ज्वनेगु निंतिं सोम्ब्रां म्हिता वयाच्वंगु महत्वपूर्ण भूमिकाया कारणं तस्कर विरुद्ध अभियान न्ह्याका वयाच्वंपिनिगु निंतिं व ‘सुपर हिरो’ खः । छाय्धाःसां सोम्ब्रां लागू वासःया कारोबारय् संलग्न व तस्कर यानाः आतकया दुने निसः स्वयां अप्वःसित ज्वनेगु प्रमुख भूमिका म्हितूगु दु ।

उमेरं नकतिनि खुदँ जक दुम्ह सोम्ब्रा जर्मन सेफर्ड प्रजातिया खः । थ्व खिचाः लागू वासःया तस्करत ज्वनेत जक ग्वाहालि याःगु मखसे ९ टन स्वयां अप्वः लागू वासः जफत यायेत नं भूमिका म्हितूगु दु । थुलिमछिं सफलता प्राप्त याःम्ह सोम्ब्रा देय्या नायकया रुपय् कायेगु यानातःगु दु ।

सोम्ब्राया थ्व सफलतां वाथावाथा कःपिं कोलम्बियाया लागू वासःया तस्कर व वया नाइकेतय्सं वयागु छ्यंया मू क्वःछिउगु दु । लागू वासःया तस्करतय्सं सोम्ब्राया छ्यंया मू ७० हजार अमेरिकी डलर (करिब ७६ लाख नेरु) क्वःछिनातःगु दु । थ्व सम्बन्धी समाचार पिहां वयेवं कालेम्बियाली सुरक्षा निकायं सोम्ब्राया सुरक्षाया निंतिं उच्च सतर्कता नालाकाःगु दु ।

 

सम्बन्धित बुखँ

LEAVE YOUR COMMENTS