म्यानमारया गृहयुद्धय् सीपिं छगू लख पुल

नेपिद्व – म्यानमारया गृहयुद्धय् सीपिनिगु ल्याः छगू लखं च्वय् थ्यंगु दु । सन् २०२१ य् म्यानमारया जुन्ता सैनां सत्ता ल्हातय् काःगु इलंनिसें न्ह्यनाच्वंगु गृहयुद्धय् सीपिनिगु ल्याः छगू लख पूगु खः ।

द्वन्द्वया घटनाया अभिलेख तया वयाच्वंगु संस्था सशस्त्र द्वन्द्व स्थान व घटना तथ्यांक (एसिएलइडी)या कथं) गृहयुद्धय् निगुलिं पक्षया यानाः छगू लख झिंप्यम्हे सिाय ज्यान वंगु दु ।

सन् २०२१ य् प्रजातन्त्रवादी नेतृ आङ साङ सुकी नेतृत्वया जननिर्वाचित सरकारया सैन्य नेतृत्वं अपदस्थ यानाः सत्ता कब्जाय् काःगु खः । घटनाया विश्लेषकतय्‌सं थुकियात एसियाया हे आतकया दकलय् घातक व सक्रिय द्वन्द्व जूगु विश्लेषण याःगु दु ।

सुकी नेतृत्वया सकारयात अपदस्थ यायेवं लोकतन्त्र समर्थकतय्‌सं व्यापक प्रदर्शन याःगु खः । सुकी व लोकतन्त्तत्रया समर्थनय् कुहां वःपिंत याःगु दमनं सशस्त्र विद्रोहया रुप काःगु खः । प्रजातन्त्रया समर्थकत जातीय सशस्त्र संगठनलिसे जानाः जुन्ता सैन्य सरकार विरुद्ध संघर्ष यानाच्वंगु दु । आतकया दुने झिंनिसः स्वयां अप्वः सशस्त्र समूह सक्रिय जुयाच्वंगु नं एसिएलइडीं न्ह्यथंगु दु ।

द्वन्द्वया कारणं सर्वसाधारणया जीवन तसकं बांमलाक प्रभावित जूगु दुसा संयुक्त राष्ट्रसंघं ३७ गू लख स्वयां अप्वः मनू आन्तरिक रुपं विस्थापित जुइधुंकूगु धाःगु दु । गृहयुद्धया कारणं दकलय् अप्वः नागरिक खाद्य असुरक्षापाखें प्रभावित जुयाच्वंगु दु ।