छत्रबहादुर कायस्थयात निक्वःगु सत्यमोहन जोशी सिरपाः
यल(नेपलभाषा टाइम्स)÷ नेपालभाषा मंकाः खलः यलपाखें दँय्दसं बीगु यानाच्वंगु न्याय्छद्वः तका दांया सत्यमोहन जोशी साहित्य सिरपाः थुगुसी अनुसन्धानकर्ता व साहित्यकार छत्रबहादुर कायस्थयात लःल्हाःगु दु ।
नेपालभाषा मंकाः खलः यलया ज्याकुथिइ जूगु खलःया दँमुँज्याया झ्वलय् बागमती प्रदेशया उद्योग, वाणिज्य तथा भूमि प्रशासन मन्त्री रामकृष्ण चित्रकारं दां सिरपाः सहित दोसल्लां न्ययेकाः हना पौ देछासें वरिष्ठ साहित्यकार कायस्थयात हनेज्या यानादीगु खः । ज्याझ्वलय् विशेष पाहां चित्रकारं मंकाः खलःया भवन निर्माण यायेगु ज्याय् बागमती प्रदेशपाखें माक्वः ग्वाहालि यायेगु बचं बियादिल ।
नेपालभाषा मंकाः खलः यलया नायः हेराकाजी महर्जनया सभापतित्वय् जूगु ज्याझ्वलय् डा. पुष्पराज राजकर्णिकारं पुरस्कृत अन्वेषक छत्रबहादुर कायस्थयात उगु सिरपाः बिइमाःगु खँय् दुबिस्ता कनादीगु खः । मूपाहां संघीय सांसद प्रेमलाल महर्जनं नेपालभाषा ल्हाइपिं म्हो जूगु इलय् थीथी कथंया आधुनिक सामग्री तयार यानाः जूसां मस्तय्त भाषा स्यनेगु कुतः यायेमाःगु खँय् बः बियादिल ।
नेवाः देय् दबूया न्वकु उमेश स्थापितं प्राप्त अधिकारयात सदुपयोग यानाः न्हूगु ढंगं न्ह्याःवनेमाःगु कनादिल । उगु ज्याझ्वलय् मंकाः खलः यलया छ्याञ्जे महेन्द्रलाल महर्जन व दांभरी कूललाल महर्जनं वार्षिक प्रतिवेदन व आर्थिक प्रतिवेदन न्ह्यब्वयादीगु खःसा न्वकू राजु ताम्राकारं सहभागी सकसितं सुभाय् देछानादीगु खः ।
LEAVE YOUR COMMENTS