शंखधर प्रतिष्ठानया अवलोकन

येँ (नेपालभाषा टाइम्स) – नेपाल संवत् न्हूदँ राष्ट्रिय समारोह समितिया पदाधिकारी दुजःपिंसं मध्यपुर थिमिइ निर्माण जूगु शंखधर सामुदायिक भवनया अवलोकन याःगु दु ।

समारोह समितिया नायः रमेश महर्जनया नेतृत्वय् वंगु पुचलं नेपाल संवत्या प्रवर्तक राष्ट्रिय विभूति शंखधर साख्वाःया नामं चायेकातःगु राष्ट्रिय विभूति शंखधर साख्वाः प्रतिष्ठान, सामुदायिक भवनलिसें शंखधर पार्कया नं अवलोकन याःगु खः । अवलोकन लिपा समारोह समितिया नायः महर्जनं नेपाल संवत्या प्रवर्तक साख्वाःया ज्यायात लुमंकाः प्रतिष्ठान हे चायेकाः याना वयाच्वंगु ज्यायात कयाः च्वछायादिसें लसता प्वंकादीगु खः । लिसें वय्कलं वइगु दिनय् समारोह समिति व प्रतिष्ठानलिसे सहकार्य यानाः न्ह्याः वनेगु व शंखधरया योगदानयात कयाः ज्या यायेगु नं प्रतिबद्धता प्वंकादीगु खः ।

मध्यपुर थिमि नगरपालिकाया प्रमुख मदनसुन्दर श्रेष्ठं शंखधर पार्कलिसें थीथी थाय्या मौलिकता ल्यंकेया निंतिं विकास निर्माणया ज्या न्ह्यानाच्वंगु जानकारी बियादीगु खः । अथे हे प्रतिष्ठानया निवर्तमान नायः श्यामकृष्ण मानन्धर, न्वकु ज्ञानराम श्रेष्ठ लगायतं प्रतिष्ठानं याना वयाच्वंगु थीथी ज्याया बारे जानकारी बियादीगु खःसा समारोह समितिया सल्लाहकार पुलांम्ह राज्यमन्त्री तीर्थराम डंगोल, मेम्ह पुलांम्ह राज्यमन्त्री दिलीप महर्जनं नं नुगःखँ प्वंकादीगु खः ।

प्रतिष्ठानया नायः चन्दनकृष्ण श्रेष्ठं समारोह समितिं प्रतिष्ठानया अवलोकन याःगु खँय् लसता प्वंकादीगु खः ।